Túrkistan oblysynda alǵash ret straıkboldan halyqaralyq ashyq chempıonat ótip jatyr
Túrkistan oblysynda «EAGLES OF TURKISTAN» atty straıkboldan (Airsoft) ashyq chempıonaty bastaý aldy.
Eki kúnge sozylatyn tartysty oıyn Túrkistan oblysy ákimdiginiń qoldaýymen, «Open Turkistan» týrıstik aqparattyq ortalyǵynyń uıymdastyrýymen tabıǵaty ásem Túlkibas aýdany, Turar Rysqulov aýylynda ótip jatyr.
Jastardyń suranysy negizinde qolǵa alynǵan is-sharanyń maqsaty – óńirde sporttyq jáne ekstremaldy týrızmdi damytý, sheteldik oıyn qatysýshylaryna Túlkibas aýdanynyń týrıstik potentsıaly men tabıǵı kórikti jerlerin tanystyrý, azamattardy salaýatty ómir saltyn ustanýǵa shaqyrý.
Ashyq chempıonatqa Qazaqstannyń Almaty men Aqmola oblystary, Almaty jáne Shymkent qalalarynyń oıynshylarynan bólek, Qyrǵyzstan elinen 3 komanda qatysýǵa qyzyǵýshylyq tanytqan.
Búgin toptyq oıynda jalpy 70 qatysýshydan quralǵan 10 komanda baq synaýda. Al, iriktelip, úzdik shyqqandar 16 shilde kúni ózara baq synaıdy.
«EAGLES OF TURKISTAN» ashyq chempıonatynyń jalpy júlde qory - 1 500 000 teńge.
