Túrkistan oblysynda alǵash ret múgedektikke shyǵý deńgeıi 18%-ǵa tómendedi
TÚRKІSTAN.QazAqparat - Túrkistan oblysynda alǵash ret múgedektikke shyǵý deńgeıi 18%-ǵa tómendedi. Bul týraly QR Premer-Mınıstri Asqar Mamınniń tóraǵalyq etýimen ótken Úkimet otyrysynda Túrkistan oblysynyń ákimi Ómirzaq Shókeev málimdedi, dep habarlaıdy QazAqparat tilshisi.
Múmkindigi shekteýli jandardy áleýmettik qorǵaý máseleleri qaralǵan otyrysta aımaq basshysy osy baǵytta atqarylyp jatqan jumystar barysyn baıandady.
«Túrkistan oblysynda 94 500 múmkindigi shekteýli azamat turady. Bul oblys halqynyń 5%-yn quraıdy. Múmkindigi shekteýli azamattardy ońaltý sharalarymen qamtamasyz etý úshin bıýdjettiń barlyq kózderinen bólingen qarjy 22%-ǵa ulǵaıyp, 2020 jyly 4,8 mlrd teńgege jetken. Nátıjesinde, 34 myńnan astam adam nemese qajettiliktiń 74%-y ońaltýdyń tehnıkalyq quraldarymen jáne áleýmettik qyzmetterimen qamtylatyn bolady»,- dedi Ómirzaq Shókeev.
Oblys ákimi sondaı-aq, óńirde múgedekterge arnalǵan zamanaýı ońaltý ortalyǵyn qurý qajettiligi týyndap otyrǵanyn atap ótti. Búgingi tańǵa múgedekterge arnalǵan syıymdylyǵy 50 oryndyq 6 áleýmettik nysannyń jáne 200 oryndyq ońaltý ortalyǵynyń qurylysyn júrgizýge jobalaý-smetalyq qujattamalary ázirlengen. Qurylys jumystary 2024 jylǵa deıin kezeń-kezeńimen júrgiziletin bolady. Onyń ishinde 50 oryndyq 3 nysannyń qurylysy bıznestiń áleýmettik jaýapkershiligi aıasynda júrgizý josparlanǵan.
«Ulttyq jospardyń mańyzdy baǵyty múmkindigi shekteýli azamattarǵa qoljetimdi orta qurý. Osy baǵytta oblysta beıimdelýge jatatyn 2 895 nysannyń 98%-y sáıkestendirilgen. Osy baǵyttaǵy jumystardy jalǵastyrý úshin basqarma jáne qoǵamdyq uıymdar tarapynan monıtorıng júrgizilip, qoljetimdi ortany odan ary arttyrý boıynsha tıisti is-sharalar atqarylýda. Bıylǵy jyly pılottyq rejımde bastama alǵan «Áleýmettik qyzmetter portaly» múmkindigi shekteýli azamattar úshin 2021 jyly tolyq iske asyrylady», - dedi oblys ákimi.
Aıta keteıik, búgingi kúnge múgedektigi bar azamattardyń 94%-y elektrondyq-tsıfrlyq qoltańba alǵan. Bul 42 myńǵa jýyq múgedektigi bar azamattarǵa ońaltý sharalaryn sapaly jáne deldalsyz erkin tańdaýǵa tıisinshe, tolyq múmkindik beredi. Óńirdegi erekshe bilim berýdi qajet etetin balalardyń 48%-y (17 272 bala) ınklıýzıvti jáne arnaıy bilimmen oqytylýda. Múgedektiktiń aldyn-alý maqsatynda anyqtaý, profılaktıkalyq jáne emdeý sharalaryn júrgizý nátıjesinde 2019 jylmen salystyrǵanda alǵash ret múgedektikke shyǵý deńgeıi 18%-ǵa tómendedi.
