Túrkistan oblysynda áleýmettik salada jumys kúsheıedi
Memleket basshysy Nursultan Nazarbaevtyń «Nur Otan» partııasynyń sezinde bergen tapsyrmalaryn taldaýǵa arnalǵan májiliste óńirdiń damý deńgeıi, alda atqarylatyn jumystar sóz boldy.
Erbol Sadyrdyń aıtýynsha, byltyr 34 389 otbasy ataýly áleýmettik kómek alsa, onyń 16,5 myńy - kópbalaly otbasylar. Elbasy tapsyrmasyna sáıkes, aldaǵy ýaqytta memlekettik qoldaýǵa ıe bolatyn turǵyndar sany arta túspek.
Oblysta turǵyn úı salý, densaýlyq saqtaý, bilim, aýdan-qalalardy ınfraqurylymmen qamtý baǵytynda jumystar atqarylǵan. Byltyr turǵyn úı qurylysy qarqyn alyp, 3047 otbasy qonys toıyn toılady. Aýdandarda 3 ınsýlttik ortalyq ashylyp, 62 eldi mekenge modýldik medıtsınalyq pýnkter ornatylǵan. 120 balabaqsha ashylyp, balalardyń 95 paıyzy balabaqshamen qamtyldy. Bıyl ol kórsetkish 100 paıyzǵa jetpek. 80 bilim nysanynyń qurylysy júrgizilip, 39-nyń qurylysy aıaqtalǵan.
Oblysta 956,6 shaqyrym jol men 7 kópirde jóndeý jumystary atqarylyp, 521,9 shaqyrym jol paıdalanýǵa tapsyrylǵan. Bıyl aýyz sý salasy boıynsha 81 nysannyń qurylysy bastalǵan. Tabıǵı gazben qamtylǵan eldi mekender sany 385-ke jetip, 2017 jylmen salystyrǵanda 12 paıyzǵa artqan. Sapaly elektr qýatymen qamtý kórsetkishi ulǵaıǵan. Bul baǵytta jumystar qarqyn alady.
Májiliste jaryssózge shyqqan kásipker Syrym Ertaev «Aýyl - el besigi» jobasy turǵyndarǵa úlken kómek jáne kásipkerler de osy baǵdarlamaǵa úles qosýy kerek ekenin aıtsa, kópbalaly ana Túımegúl Ergeshqyzy kópbalaly otbasylarǵa beriletin járdemaqynyń ósýi eldi qýanyshqa bólegenin jetkizdi. «Nur Otan» partııasy Túrkistan oblystyq fılıaly janyndaǵy «Mıras» qoǵamdyq keńesiniń tóraǵasy, jazýshy Marhabat Baıǵut Elbasymyzdyń áleýmettik salaǵa, óńirlerdi damytý máselesine erekshe toqtalǵanyn aıta kele basshylar osy mindetti oryndaýda halyqqa jaqyn ári qamqor bolsa degen tilegin jetkizdi. Partııanyń «Baqýatty qoǵam: onjyldyqtyń 10 maqsaty» atty baǵdarlamasy eldiń eńsesin tiktep, damýyna yqpal etetinin qujat ekenin atap ótti.
Májilisti qorytyndylǵan Túrkistan oblysynyń ákimi Ómirzaq Shókeev «Memleket tarapynan barlyq salaǵa tıisti qarajat bólinip jatyr. Sondyqtan Elbasy júktegen mindetterdi oryndaý baǵytynda jumysty shıratýymyz qajet. Aýdan, qala ákimderi turǵyndarmen jıi kezdesip, olardyń jaǵdaıyn bilip turý kerek. Kabınette otyryp, qurǵaq esep bermeı, elmen etene aralasyp, jaǵdaıyn jasańyzdar. Elge qyzmet etý, Túrkistandy túletý - barshamyzdyń paryzymyz», - osy májilistegi tapsyrmalar boıynsha ákimder men basqarma basshylarynyń jumysy júıeli túrde qadaǵalanatynyn jetkizdi.
