Túrkistan oblysynda áleýmettik mańyzy bar azyq-túlik baǵasy baqylanýda
TÚRKІSTAN. QazAqparat – Túrkistan oblysynda karantındik sharalar kezinde kásipkerlerge kórsetiletin memlekettik qoldaýlar men óńirdegi áleýmettik mańyzy bar azyq-túlik taýarlarynyń baǵasyn turaqtandyrý taqyrybynda brıfıng ótti. Oblystyq kásipkerlik jáne saýda basqarmasynyń basshysy Nurbaqyt Imanqulov óńirde azyq-túlik tapshylyǵy men baǵanyń negizsiz ósýi baıqalmaıtynyn atap ótti, dep habarlaıdy QazAqparat tilshisi.
Statıstıkalyq málimetterge súıensek, respýblıkanyń 19 iri qalasynyń ishinde Túrkistan áleýmettik mańyzy bar azyq-túlik taýarlarynyń baǵa kórsetkishi boıynsha 13-shi orynda tur.
«Pandemııa - saýda obektileriniń qyzmetin ýaqytsha toqtata turýyna jáne halyq tarapynan suranysty shektep, taýarlar baǵasynyń ósýine alyp kelgendigi belgili. Degenmen, áleýmettik mańyzy bar azyq-túlik taýarlarynyń baǵasy kúndelikti baqylaýda. Áleýmettik mańyzy bar azyq-túlik taýarlaryna baǵalardy turaqtandyrý komıssııasy men mobıldi top jumysy jalǵasyp keledi. Jaǵdaı turaqty dep aıtýǵa negiz bar»,- dedi basqarma basshysy.
Qazirgi tańda azyq-túlik baǵasyn turaqtandyrý komıssııasy turaqty jumys isteýde. Máselen, aǵymdaǵy jyldyń 24 qarashasyndaǵy komıssııa otyrysynyń hattamasyna sáıkes, turaqtandyrý qory arqyly baǵa suratý tásilimen qosymsha 403,4 tonna azyq-túlik taýarlaryn (qaraqumyq jarmasy - 50 tonna, qyryqqabat - 101 tonna, makaron ónimderi - 32 tonna, kartop - 59 tonna, sábiz - 101,8 tonna, qumsheker - 53 tonna, sıyr eti - 6,6tonna) alýǵa memlekettik satyp alý jarııalanǵan.
