Túrkistan oblysynda álemdegi eń jyldam ósetin aǵash ósirilýde
TÚRKІSTAN. QazAqparat - Túrkistan oblysy Saryaǵash aýdanynyń qurǵyny Baltabaı Qurbanbaev Pavlovnııa aǵashyn ósirýdi qolǵa aldy, dep habarlaıdy Túrkistan oblysy ákimdiginiń baspasóz qyzmeti.
Ol 2017 jyly Qytaı elinen atalmysh aǵashtyń 50 myń túbin aldyryp, aýdandaǵy bos jatqan 2 gektar jerge otyrǵyzǵan. Kásipker bul daraq eń baǵaly aǵashtardyń biri ekenin aıtady.
«Pavlovnııa aǵashy álemdegi eń jyldam ósetin aǵash dep aıtýǵa bolady. Jylyna 4-6 metrge deıin ósse, boıy 25 metrge deıin jetedi. 6 apta gúldep turady. Eýropa elderinde jıhaz jasaýǵa osy aǵashty qoldanady. Odan bólek, qaıyq, shańǵy, tennıs raketkasyn, mýzykalyq aspap taǵy basqa da buıymdar daıyndaýǵa da taptyrmaıtyn dúnıe. Bul aǵashta kóz bolmaıdy. Óte ıilgish keledi. Bastapqyda adamdar mundaıǵa senińkiremeı qaraǵan. Qazir jan-jaqty kóz jetkizip, kóshetterin alyp kóbeıtýdi oılastyrýda. Túsingen adamǵa munyń paıdasy ushan teńiz», - dedi Baltabaı Qurbanbaev.
Kásipkerdiń sózinshe, ońtústiktiń klımaty Pavlovnııa aǵashyn ósirýge óte qolaıly. Kútimi jaqsy bolsa, 3 jyldan keıin aǵashty qajetke jarata berýge bolady.
