Túrkistan oblysynda alaıaqtyq qylmysy 4 ese kóbeıgen
TÚRKІSTAN. QazAqparat - Túrkistan oblysynda jyl basynan beri eki aıdyń ishinde 81 alaıaqtyq qylmysy tirkelgen. Bul ótken jyldyń sáıkes kezeńimen salystyrǵanda 4 ese kóp ekendigin kórsetken, dep habarlaıdy QazAqparat tilshisi.
Oblystyq PD krımınaldyq polıtsııa basqarmasynyń asa mańyzdy ister jónindegi aǵa jedel ýákili, polıtsııa kapıtany Shyńǵys Jaılaýbektiń aıtýynsha, ótken óńirde 225 ınternet alaıaqtyǵy boıynsha qylmystyq is tirkelgen.
Onyń basym bóligi Túrkistan, Kentaý qalalary men Jetisaı, Saryaǵash, Keles aýdandarynda oryn alǵan.
Internet alaıaqtyqtyń aldyn alý maqsatynda Túrkistan oblysy polıtsııa departamentiniń qyzmetkerleri profılaktıkalyq jumystardy júıeli túrde júrgizgen.
Máselen, Maqtaaral aýdanynda jergilikti turǵyn áleýmettik jeli arqyly bir topqa kirgen.
Ol aqshasyn eki esege ulǵaıtý maqsatynda 19 myń teńgesin aýdarǵanyn aıtqan.
Alaıda toptyń uıymdastyrýshysy aqshany alysymen izin sýytypty.
Jedel-izdestirý is-sharalary barysynda aýdannyń tártip saqshylar bir táýlik ishinde alaıaqtyq jasady degen áıeldi ustady.
Dál osyndaı jaǵdaı Jetisaı aýdanynda da oryn alǵan. Internet alaıqtarǵa aldanǵan jergilikti turǵyn 980 myń teńgesin aýdaryp jibergeni anyqtalǵan.
Nátıjesinde bul qylmysqa qatysy bar 2 kúdikti áıel ustaldy.
«Ótken jyly túrkistandyq tártip saqshylary 57 mıllıon teńgeniń ınternet-alaıaqtyǵyn jasaǵan kúdiktini qolǵa túsirdi. Ol telefon arqyly ónimderge tonnalap tapsyrys berip, óz esepshotyna aqshasyn aýdartyp alǵan. Sońynan baılanysty birden úzgen. Kúdikti Nur-Sultan qalasynan ustaldy»,- deıdi polıtsııa kapıtany Shyńǵys Jaılaýbek.
