Túrkistan oblysynda alaıaq áıel 2 mln teńgeni qaltasyna basqan

TÚRKІSTAN. QazAqparat - Túrkistan oblysy, Otyrar aýdanynda alaıaqtyq jolmen birneshe turǵynnan 2 mıllıon teńgeden astam aqsha alǵan áıel ustaldy, dep habarlaıdy QazAqparat tilshisi.

Jábirlenýshi kúdiktiniń bankterdiń birinen iri kólemde nesıe alyp beremin dep senimine kirip, 720 myń teńgeden astam aqshasyn zańsyz ıemdenip ketken.

Oblystyq PD baspasóz qyzmetiniń málimetinshe, kúdikti turǵylyqty mekenjaıynan ustalǵan. Ol qamaýǵa alynyp, tergeý amaldary júrgizilýde.

«Tergeý barysynda jas kelinshektiń alaıaqtyqtyń 5 qylmysyna qatystylyǵy anyqtalǵan. Osylaısha jábirlenýshilerdiń árqaısysynan 225 - 720 myń teńge aralyǵynda alaıaqtyq jolmen aqsha alyp júrgeni belgili boldy. Qazirgi tańda ustalǵan azamatshanyń budan basqa da qylmystarǵa qatystylyǵy anyqtalýda», - delingen habarlamada.