Túrkistan oblysynda Alash arystary men Qajymuqanǵa eskertkishter ornatyldy

TÚRKІSTAN. QazAqparat - Túrkistan oblysy, Qazyǵurt aýdanynyń Saraphana aýylynda Alash arystary men Qajymuqanǵa arnalǵan eskertkishter ornatyldy. Eńseli eskertkishter Táýelsizdiktiń 30 jyldyǵyna arnaldy, dep habarlaıdy QazAqparat tilshisi.

«Máńgilik el» kesheninde oryn tepken eskertkishter ult úshin ómirin kúreske aınaldyrǵan kóshbasshylar men qaıratkerlerdi beıneleıdi. Saltanatty is-sharaǵa elimizdiń túkpir-túkpirinen zııaly qaýym ókilderi, qoǵam qaıratkerleri, tarıhshylar men qalamgerler qatysty. Atap aıtsaq, Mámbet Qoıgeldi, Qýanysh Aıtahanov, Saýytbek Ábdirahmanov, Narmahan Begalyuly jáne ózge de tulǵalar sóz sóılep, rýhanı mańyzdy bastamany joǵary baǵalady. Metsenat Beket Turǵaraev pen jergilikti ákimdiktiń úılesimdi isine rızashylyqtaryn bildirdi. Qazyǵurt aýdanynyń ákimi Arman Abdýllaev pen tanymal azamattar da júrekjardy lebizderin ortaǵa salyp, Alash qaıratkerleri Máńgilik elmen birge máńgi jasaıtynyn aıtty.

Sonymen birge osy kúni «Anaǵa taǵzym» jáne Qajymuqan balýanǵa arnalǵan eskertkishterdiń de ashylý saltanaty ótti. Dańqty balýannyń 150 jyldyǵyna arnalǵan eskertkishke jáne ananyń meıirimi sýrettelgen óner týyndysyna qonaqtar oń baǵasyn berdi. Bul ıgi bastamaǵa belgili metsenat Beket Turǵaraev qoldaý kórsetken bolatyn.