Túrkistan oblysynda ákimderdiń qyzmeti jańa jumys ornyn ashýmen ólshenedi
Memleket basshysy Qasym-Jomart Toqaevtyń tapsyrmasy boıynsha jyl saıyn árbir 10 myń turǵynǵa keminde 100 jumys ornyn qurý ákimderdiń mindeti bolyp bekitildi.
Osy másele talqylanǵan oblys ákimi apparatynyń otyrysynda óńir basshysy Ómirzaq Shókeev árbir aýdan, qala ákiminiń negizgi kórsetkishi jańa jumys oryndaryn uıymdastyrýmen ólshenetinin aıtty.
«Ár ákim qandaı jumys ornyn ashady, nátıje soǵan baılanysty bolady. Negizgi kórsetkishterińiz sonymen ólshenedi. Janashyrlyq tanytyp, halyqpen birge jumys istegen jón. Kúnde aldyńyzda ár aýyldaǵy jumyssyzdardyń tizimi turýy kerek. «Olardy qalaı jumyspen qamtımyn?», «Ne isteý kerek?» degen suraqtar mazalaýy tıis. Jańa jobalar, jumys oryndaryn ashý qajet. Aýdan, qaladaǵy qabileti bar adamdarmen birlese jumys isteńizder», - dedi Ómirzaq Shókeev.
Oblystyq strategııa jáne ekonomıkalyq damý basqarmasynyń basshysy Qanat Qaıypbektiń aıtýynsha, óńirde 777 myń adam jumyspen qamtylǵan.
Al, oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva «Eńbek» baǵdarlamasy arqyly bıyl aýqymdy jumystar júzege asatynyn aıtyp ótti.
«Jastar tájirıbesine» bıyl 5658 myń adamdy joldaý kózdelip, merzimi 12 aıǵa uzartylady. Eńbekaqysy 30 AEK nemese 91 890 teńgege jetkizilmek.
Óńirde 2 jyldan beri júzege asyp kele jatqan «Qamqorlyq» baǵdarlamasy arqyly 2,7 myń otbasy 825 mln. teńgege demeýshilik kómek alsa, 85 úısiz júrgen otbasy turǵyn úımen qamtamasyz etilgen.
Derekterdi saralaǵan oblys ákimi sala basshylary men aýdan, qala ákimderine halyqtyń turmysyn jaqsartý, jańa jumys oryndaryn kóbeıtý jóninde tapsyrma berdi.
