Túrkistan oblysynda ákim saılaýyna túsken úmitkerlerdiń 4,7 paıyzy ǵana - áıelder

TÚRKІSTAN. QazAqparat - Túrkistan oblysynda aýyl ákimderiniń saılaýyna qatysatyn úmitkerlerdi tirkeý 26 maýsymda bastalyp, 14 shilde kúni saǵat 18.00-de aıaqtaldy, dep habarlaıdy QazAqparat.

Nátıjesinde 210 úmitker tirkelip otyr. Onyń ishinde 83 úmitker – saıası partııalar, 127 úmitker – ózin-ózi usynǵandar.

Tirkeý jumystary aıaqtala sala úmitkerlerdiń úgit-nasıhat jumystary bastalyp ketti.

23 shilde kúni nasıhat jumystary aıaqtalyp, 25 shilde aýyl ákimderin saılaýdyń alǵashqy kezeńi bastalady.

Bul týraly Túrkistan oblystyq aýmaqtyq saılaý komıssııasynyń tóraǵasy Álibek Ómirálıev málimdedi.

Onyń aıtýynsha, saılaý kezinde 60 aýyl okrýgte 241 ýchaskede daýys berýge bolady.

«Barlyq tirkelgen 210 úmitkerdiń ishinde 10-y (4,7%) áıel adam. Ortasha jas – 45 jas, eń jas úmitker – 27 jasta. Usynylǵandardyń 31-i — qyzmettegi ákim, 74-i — memlekettik qyzmette, 19-y — kommertsııalyq saladaǵy ókilder, 70-i — bıýdjettik saladaǵy qyzmetkerler, 1 adam — jumyssyz. Eń kóp saılaýshylar sany Keles aýdany, Abaı aýyl okrýginde – 12 655 adam. Eń az saılaýshylar Saryaǵash aýdany, Álimtaý aýyldyq okrýginde – 805 adam. Úmitkerlerdiń eń kóp tirkelgen saılaý okrýgi – Saryaǵash aýdanyndaǵy Qurkeles aýyldyq okrýginde», - dedi Álibek Kádenuly.