Túrkistan oblysynda ákeler mektebi máselesi talqylandy
TÚRKІSTAN. QazAqparat – Túrkistan oblysy, Keles aýdanynda «Ákeler mektebi – tárbıe mektebi» atty ákelerge arnalǵan oblystyq semınar ótti. Basqosýda ákeniń otbasyda alar orny men bala tárbıesindegi róli jaıly keńinen talqylandy, dep habarlaıdy QazAqparat tilshisi.
Semınarǵa aýdan ákimi Aqmentaı Esbaev pen oblystyq ardagerler keńesi tóraǵasynyń orynbasary Kenjehan Tólebaev, bilim salasynyń ókilderi men aýdan turǵyndary qatysty. Keleli kezdesýde ákeniń balaǵa qanshalyq ónege ekenin kórsetetin beınerolık kórsetilip, óńirde qolǵa alynǵan jobanyń tıimdiligi túsindirildi.
Aýdandyq ákeler mektebi keńesiniń tóraǵasy Oryntaı Begaısov pen №20 T.Berdııarov atyndaǵy jalpy orta mektebiniń ákeler mektebiniń tóraǵasy Orynbasar Egemberdıev arnaıy jaryssózge shyǵyp óz oılaryn ortaǵa saldy. Áke týraly ánder shyrqalyp, «Ata-ananyń qadiri» atty kórinis kórsetildi.
Jıynǵa qatysqan oblystyq ardagerler keńesiniń tóraǵasy jıynnyń mańyzdylyǵyna toqtaldy.
«Áke – bala úshin taý tulǵa. Bala ákege qarap ósedi. Ár áke balasyna ýaqyt bólip, keńesip otyrǵany durys. Sonda balanyń oı órisi durys qalyptasyp, kóńil kókjıegi keńeıip, kez-kelgen máselege jan-jaqty qaraýǵa umtylady. Ózi túzý aǵashtyń kóleńkesi esh ýaqytta qısyq bolmaıdy. Áke durys tárbıe berse, qoǵamnyń durys damýyna aıtarlyqtaı úles qosary anyq», – dedi Jeńisbek Máýlenqulov.
