Túrkistan oblysynda agroónerkásiptik keshendi damytý joldary talqylandy
TÚRKІSTAN. QazAqparat – Túrkistan oblysy Kásipkerler palatasy alańynda oblys ákiminiń orynbasary Ulan Tájibaevtyń qatysýymen Óńirlik keńes janyndaǵy agroónerkásiptik keshen jáne tamaq ónerkásibi komıtetiniń keńeıtilgen májilisi ótti. Jıynda óńirdegi aýylsharýashylyǵy máseleleri men agroónerkásiptik keshendi damytý joldary talqylandy, dep habarlaıdy QazAqparat tilshisi.
Jıynǵa Túrkistan oblysy Aýyl sharýashylyǵy basqarmasynyń basshysy Nurbek Badyraqov pen qarjy ınstıtýttarynyń ókilderi, agroónerkásiptik keshen men tamaq ónerkásibi komıtetiniń músheleri qatysty.
Májiliste sóz alǵan oblystyq Kásipkerler palatasynyń dırektory Tımýr Naqypbekov sharýalardyń ózekti máselelerin tolyqqandy qaraý jáne olardy sheshý joldaryn izdestirý jaıyn jetkizdi.
Jıynǵa onlaın formatta qatysqan oblystaǵy 15 aýdannyń kásipkerleri jergilikti atqarýshy organ ókilderine kókeıkesti suraqtaryn qoıyp, usynys-tilekterin bildirdi.Ashyq áńgime barysynda jergilikti sharýalardyń júıeli máseleleri qozǵalyp, olardy sheshý boıynsha usynystar talqylandy.
Oblystyq aýyl sharýashylyǵy basqarmasynyń basshysy Nurbek Badyraqov óz kezeginde AÓK salasynda atqarylǵan jumystar týraly baıandady. Basqosýda sonymen qatar, maqta sharýashylyǵyndaǵy elıtalyq tuqymdardy keńinen qoldaný arqyly ónimdilikti arttyrý men agroónerkásiptik ınfraqurylymdy damytý, aýylsharýashylyǵy tehnıkasyn jańǵyrtý jaıy sóz boldy.
Aýylsharýashylyǵy kooperatıvterin qurý men sýbsıdııalaý sııaqty ózge de ózekti máseleler keńinen aıtyldy.
Jıyn qortandysymen qatysýshylar mundaı kezdesýlerdi toqsan saıyn ótkizip otyrý týraly kelisimge keldi.
