Túrkistan oblysynda ádisteme ortalyǵynyń basshysy para berý kezinde ustaldy

TÚRKІSTAN. QazAqparat - Túrkistan oblysynda Bilim basqarmasyna qarasty ortalyqtyń dırektory G. Sebepova, bólim basshysy Ý. Tutqyshbaev jáne bas esepshi A. Kýşenko 6 mln teńge kóleminde para berý kezinde ustaldy. Bul týraly Shymkent qalasy boıynsha Memlekettik kirister departamentiniń ekonomıkalyq tergeý qyzmeti mamandary málim etti, dep habarlaıdy QazAqparat tilshisi.

Resmı málimetke sáıkes, ustalǵandar qomaqty parany olarǵa qatysty tergeý sharalaryn toqtatý maqsatynda bermek bolǵan. 

«2018 jyldyń 8 qyrkúıeginde Shymkent qalasy boıynsha MKD ETQ qyzmetkerleri júrgizgen jedel-izdestirý sharalary kezinde Túrkistan oblysy boıynsha Bilim basqarmasy janyndaǵy Ádistemelik ortalyqtyń basshysy, dene shynyqtyrýdy damytý bóliminiń basshysy jáne sol ortalyqtyń bas esepshisi aldyn ala kelisim boıynsha para berip jatqan jerinde ustady. MKD ókilderiniń málimetinshe, olar - úsh kúdikti Shymkent qalalyq MKD EQT qyzmetkerine osyǵan deıin mádenı is-sharalarǵa bólingen qarajatty jymqyrý deregi boıynsha qozǵalǵan qylmystyq iske qatysty oń sheshim qabyldaýy úshin 6 mıllıon teńge kóleminde para berdi dep kúdikke ilinip otyr» delingen habarlamada. 

Qazirgi tańda atalǵan jaıt negizinde qozǵalǵan qylmystyq is Qylmystyq kodekstiń 367-baby 3-bóligi 1-tarmaǵy («Para berý») boıynsha tirkeýge alynyp, tergeý amaldary júrgizilýde. Shymkent qalalyq mamandandyrylǵan tergeý sotynyń sanktsııasymen 10 qyrkúıekten bastap atalǵan ortalyqtyń basshysy men dene shynyqtyrýdy damytý bóliminiń basshysy ýaqytsha tergeý abaqtysyna qamaýǵa alyndy.