Túrkistan oblysynda adamdy qaǵyp ketip, oqıǵa ornynan izin sýytqan júrgizýshi ustaldy
TÚRKІSTAN. QazAqparat – Túrkistan oblysynda júk kóligi joldy kesip ótpek bolǵan adamdy qaǵyp ketken. Oqıǵa saldarynan jaıaý adam kóz jumdy. Al júrgizýshi oqıǵa ornynan boı tasalaǵan, dep habarlaıdy QazAqparat.
Saıram aýdandyq PB-nyń kezekshi bólimine túngi ýaqytta «Almaty-Tashkent-Termez» tas jolynyń 667 shaqyrymynda jol-kólik oqıǵasy bolǵany týraly habarlama kelip tústi. Oqıǵa ornyna shuǵyl jetken polıtsııa qyzmetkerleri belgisiz kóliktiń júrgizýshisi joldy kesip ótpek bolǵan turǵyndy qaǵyp, sońynan qashyp ketkenin anyqtady. Apat saldarynan jaıaý júrginshi oqıǵa ornynda kóz jumady.
Atalǵan jaıt Saıram aýdandyq polıtsııa basqarmasynda QR QK-niń 345-baby «Kólik quraldaryn júrgizýshi adamdardyń jol qozǵalysy nemese kólik quraldaryn paıdalaný erejelerin buzýy» jáne 347-baby «Jol-kólik oqıǵasy bolǵan jerden ketip qalý» boıynsha tirkeldi.
Jol-kólik oqıǵasyna qatysy bar júrgizýshini ustaý maqsatynda Saıram aýdandyq polıtsııa basqarmasy qyzmetkerleri jedel-izdestirý júrgizdi. Oqıǵa ornynan belgisiz júk kóliginiń synyq qaldyqtary alyndy. Jan-jaqqa baǵytnamalar berilip, júıeli jumystar atqaryldy. Júrgizilgen is-sharalardyń nátıjesinde tártip saqshylary kináli júrgizýshini qolǵa túsirdi. Ol qamaýǵa alyndy. Tekserý barysynda anyqtalǵandaı Tashkent baǵytyna qaraı ketip bara jatqan «Mersedes-Bens» markaly júk kóliginiń júrgizýshisi belgilenbegen jerden kesip ótpek bolǵan Almaty qalasynyń turǵynyn qaǵyp ketken.
Qazirgi ýaqytta atalǵan jaıt boıynsha sotqa deıingi tergeý amaldary júrgizilýde. Saraptama taǵaıyndaldy. Tártip saqshylary bolǵan oqıǵanyń mán-jaıyn anyqtaýda.
Óz kezeginde, Túrkistan oblysynyń polıtseıleri, jol qozǵalysyna qatysýshylarǵa jolda abaı bolýǵa jáne jol qaýipsizdigi erejesin buzbaýǵa, jyldamdyqty asyrmaýǵa, qashyqtyqty saqtaýǵa, al jol-kólik oqıǵasy bolǵan jaǵdaıda oqıǵa ornynan ketpeýge keńes beredi.
