Túrkistan oblysynda adam qaǵyp óltirip qashyp ketken júrgizýshi ustaldy
ARYS. QazAqparat – Túrkistan oblysynyń Arys aýdanynda júrginshini kóligimen qaǵyp óltirip, oqıǵa ornynan qashyp ketken júrgizýshi ustaldy, dep habarlaıdy QazAqparat oblystyq Polıtsııa departamentine silteme jasap.
Taıaýda Arys aýdandyq polıtsııa bólimine jergilikti turǵynnyń biri habarlasyp, jol-kólik oqıǵasy bolǵanyn baıandaıdy. Oqıǵa ornyna birden barǵan polıtseıler ol jerden máıitti kóredi. Al, júrgizýshi bolsa, oqıǵa ornynan birden izin sýytqan.
«Osylaısha, máıitke qatysty tıisti jumystar júrgizilip, oqıǵa ornyna tekserý sharalary jasalady. Ol jerdi tekserý kezinde polıtseıler aıǵaqty zat retinde kóliktiń aldyńǵy nómirin taýyp alady. Sonymen qatar, basqa da usaq-túıekterge deıin mán berip, tıisti jumystardy atqarady», delingen habarlamada.
Polıtseıler sol kúni kóliktiń kimge tıesili ekenin anyqtaıdy. Sondaı-aq, Túrkistan oblysy boıynsha barlyq qala, aýdandyq polıtsııa basqarma, bólimderine kúdiktige qatysty habar beredi.
Qylmysty ashý úshin jedel áreket etken polıtseıler Ordabasy aýdanynan kúdiktiniń kóligin tabady. Teksere kele kólikti tastap ketkendigi belgili bolady. Osydan soń, Arys aýdanynyń polıtseıleri kúdiktini tez arada quryqtaýǵa kóshedi. Kóp uzamaı ekinshi kúni Tóle bı aýdany Leńgir qalasynda kósheden kúdikti ustaldy.
Teksere kele, kúdikti Shymkent qalasynyń turǵyny bolyp shyqty. Búgingi tańda ustalǵan júrgizýshi qamaýda.
Aıta keterligi, osy oqıǵa Arys aýdandyq PB-de sotqa deıingi tergeý tizilimine tirkelip, QR Qylmystyq kodeksiniń 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» jáne 347-baby «Jol-kólik oqıǵasy bolǵan jerden ketip qalý» boıynsha qylmystyq is qozǵaldy.
