Túrkistan oblysynda Abaı atyndaǵy saıabaq ashyldy

SOZAQ. QazAqparat - Túrkistan oblysy Sozaq aýdany Sholaqqorǵan aýylynda Konstıtýtsııa kúni qarsańynda eki birdeı saıabaq ashyldy. Demalys ornynyń birine qazaqtyń uly aqyny, aǵartýshy, ǵulama oıshyl Abaıdyń esimi berildi. Saıabaqta uly aqynnyń músini beınelengen záýlim eskertkishi ornatylǵan, dep habarlaıdy QazAqparat oblys ákiminiń baspasóz qyzmetine silteme jasap.

Saıabaqtyń jalpy aýmaǵy - 2 gektar. Onda qazirdiń ózinde 400 túp tal egilip, aınalasy abattandyrylǵan. Túrli-tústi shamdar ornatylyp, aıaq joldar tóselgen. Aldaǵy ýaqytta jergilikti turǵyndardyń janǵa saıa tabatyn súıikti demalys orny bolmaq.

Jańa demalys ornynyń saltanatty ashylýyna aýdan ákimi Salyhan Polatov, aýdandyq ardagerler keńesiniń tóraǵasy Qabylbek Espenbetov qatysyp, jurtshylyqty Konstıtýtsııa kúnimen quttyqtady.

«Bıyl uly aqyn Abaıdyń týǵanyna 175 jyl tolyp otyr. Memleket basshysy Qasym-Jomart Toqaevtyń bastamasymen 10 tamyz Abaı kúni bolyp belgilendi. Bul aqynǵa kórsetilgen úlken qurmet. Bizde týǵan jer tósinen sáni men saltanaty kelisken eki birdeı jańa demalys ornyn ashyp otyrmyz. Bul jer halyqtyń kóńil kóterip, balalardyń oınaıtyn súıikti orynǵa aınalady. Barshańyzdy kele jatqan Konstıtýtsııa kúnimen quttyqtaımyn», – dedi aýdan ákimi.

Ekinshi ashylǵan saıabaq «Teriskeı» dep atalady. El ıgiligine paıdalanýǵa berilgen demalys ornynyń aýmaǵynda 1000 túp tal egilgen. Jalpy aýmaǵy - 4 gektar.

Saıabaq ishindegi bulaq ústinde kópir salynyp, jaıaý júrginshi joly tóselgen. Kópshilikke arnap soǵylǵan tóbesi jabyq sákiler de saıabaqqa kórik berip tur.

Aldaǵy ýaqytta munda kópjyldyq gúlder egilip, balalar oıyn alańshasy men attraktsıondar ashylady dep josparlanyp otyr.