Túrkistan oblysynda AÁK alatyn azamattar baqshadan mol ónim alýdy úırendi

TÚLKІBAS. QazAqparat - Túrkistan oblysynyń ákimi Ómirzaq Shókeev oblys aýmaǵynda aýyl sharýashylyǵyn damytý maqsatynda 3 negizgi baǵytty belgilep bergen bolatyn. Sonyń biri - úı irgesindegi jerdi tıimdi paıdalaný arqyly mol ónim alý, dep habarlaıdy QazAqparat óńirlik kommýnıkatsııa qyzmetine silteme jasap.

Búgin osyǵan oraı Túlkibas aýdany Shaqpaq aýyl okrýginde barlyq sanıtarlyq talaptardy saqtaı otyryp kóshpeli semınar ótti. Semınarǵa aýdan ákimi N.Baıǵut, sharýa qojalyq tóraǵalary men memleket tarapynan AÁK (ataýly áleýmettik kómek) pen qaıtarymsyz grant alatyn azamattar jáne aýdan turǵyndary qatysty.

Semınardyń maqsaty - úı irgesindegi jerge ızraıldik tehnologııany engizýdiń tıimdiligin túsindirý. Memleket tarapynan AÁK pen qaıtarymyz grant alatyn turǵyndarǵa óz kásibin ashýǵa baǵyt-baǵdar berý, turmystyq jaǵdaıyn jaqsartýǵa yqpal etý.

Kóshpeli semınar baǵdarlamasyna sáıkes, aýdan ákimi bastaǵan okrýg ákimderi men semınarǵa qatysýshylar tamshylatyp sýǵarý tásilin qoldanyp, úı irgesindegi jerge qyzanaq otyrǵyzǵan jeke kásipker Z.Rahmatýllaevanyń úıine bardy. Onda aýdandyq aýylsharýashylyq bóliminiń basshysy semınarǵa qatysýshylarǵa ızraıldik tehnologııanyń tıimdiligi men artyqshylyqtaryn kórsetip, túsindirdi.

Izraıldik tehnologııanyń qarapaıym aryq arqyly sýǵarý ádisinen ereksheligi jerdi aýdaryp daıyndaýdy jáne aryq qazýdy qajet etpeıdi. Qarapaıym sýǵarý ádisinen qaraǵanda ónimdi 3 ese kóp beredi. Sondaı-aq, egilgen kókónis aınalasyna aram shóp shyqpaıdy.

Izraıldik tehnologııa ornatylǵan egistik alqabynda AÁK pen qaıtarymsyz grant alatyn turǵyndarmen suhbat qurǵan aýdan ákimi N.Baıǵut turǵyndarǵa memleket tarapynan berilip jatqan qaıtarymsyz qarjyny paıdalana otyryp, turmystyq jaǵdaıyn jaqsartyp alý qajettigin aıtty.

Sonymen qatar, kóshpeli semınarǵa qatysýshylar «Bereke», «Imperııa», «Jarqynbek» jáne «Aqbıik» sharýa qojalyqtarynyń jumysymen tanysyp, qajetti maǵlumattar aldy.