Túrkistan oblysynda 9 ben 11-synyp oqýshylary mektepten oqıdy
TÚRKІSTAN. QazAqparat - Túrkistan oblysynda III toqsanda 1-5 synyp jáne bitirýshi 9-ynshy, 11-inshi synyp oqýshylary dástúrli formatta oqıtyn bolady. Osy jáne ózge de máseleler oblys ákimi Ómirzaq Shókeevtiń tóraǵalyǵymen ótken lezdemelik májiliste qaraldy, dep habarlaıdy QazAqparat.
Málim bolǵandaı, Túrkistan oblysynda III toqsanda qashyqtan oqý jalǵasady. Tek 1-5 synyp, 9 ben 11-synyp oqýshylary, ıaǵnı bitirýshi synyptar sanıtarlyq talaptardy saqtaı otyryp, mektepte oqıtyn bolady.
Túrkistan oblysynda oqýshylar kompıýtermen 100% qamtylǵan. Mektepterde kompıýterlerge qajettilikti joıý úshin QR Úkimeti rezerviniń qarajatynan 57 190 kompıýter satyp alyndy. Sondaı-aq, mektep qorynan, jergilikti bıýdjet pen demeýshiler esebinen satyp alynǵan 28 101 kompıýter oqýshylarǵa berildi. Oblys aýmaǵyndaǵy 918 mekteptegi oqýshylardyń jalpy sany – 499 975.
Sondaı-aq otyrysta bilim bólimderin basqarý jáne bıýdjet qarjysyn ákimshilendirý fýnktsııalaryn aýdandyq deńgeıden oblystyq deńgeıge ótkizý máseleleri, ıaǵnı bilim salasyndaǵy basqarý júıesiniń ózgerýine qatysty atqarylǵan jumystar baıandaldy.
Oblys aýmaǵynda koronavırýs ınfektsııasymen kúres jumystarynyń barysy da sóz boldy. Bir apta ishinde óńirde Covid-19 vırýsyn juqtyrǵan 56 adam tirkelgen. Ósý úrdisi baıqalǵan Maqtaaral, Jetisaı men Saıram aýdandarynda shekteý sharalaryn qatańdatý jumystary júrgizilýde.
Ó.Shókeev aýdan, qala ákimderine kemshilikterdi joıýdy, al oǵan jol bergen jaýapty laýazymdy tulǵalardy tártiptik jaýapkershilikke tartý máselesin qarastyrýdy júktedi.
«Qaıtadan tártip ornatyńyzdar. Keı jerler, ásirese meıram kúnderinen keıin bosańsyp ketip jatyr. Buǵan jol bermeý kerek. Araqashyqtyqty saqtaý máselesin, maska rejımin, karantın shekteýleriniń saqtalýyn qatań qadaǵalaý qajet. Barlyq aýdan, qala ákimderi buǵan tikeleı jaýap beredi», – dedi oblys ákimi.
Sonymen qatar Ómirzaq Shókeev apparat májilisinde Túrkistan qalasyn damytý boıynsha birqatar tapsyrmalar berdi. Qalany kórkeıtý, kógaldandyrý máseleleri men ınfraqurylymdy damytýdy kúsheıtýdi basa aıtty.
Budan bólek, sý qoımalarynyń qurylysy men kólder júıesiniń jańartýyn kóktemge deıin tolyq aıaqtaýdy mindettedi.
