Túrkistan oblysynda 9 aıda 100 myńǵa jýyq otbasyǵa ataýly áleýmettik kómek berildi
TÚRKІSTAN. QazAqparat - Túrkistan oblysynda bıylǵy jyldyń 1 qazanyndaǵy esep boıynsha ataýly áleýmettik kómek 99,7 myń otbasyǵa, naqty 577,8 myń adamǵa taǵaıyndalǵan, dep habarlaıdy QazAqparat Óńirlik kommýnıkatsııalar qyzmetine silteme jasap.
Onyń ishinde 352,4 myńy – balalar, 65,7 myń otbasy – kóp balalylar. Búgin bul týraly Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva málim etti. Oblysta AÁK tóleýge kózdelgen 60,7 mlrd teńge qarjynyń búgingi tańda 71%-y, 43 mlrd teńgesi ıgerilgen. «AÁK tólemderi men jumyspen qamtý sharalary qıyn ómirlik jaǵdaıdan shyǵý úshin kóptegen otbasylarǵa kómektesti. Muqtaj otbasylar memleket tarapynan shynaıy qoldaý kórdi, onyń jartysy derlik kópbalaly otbasylar, sondaı-aq, keıbireýleri az qamtylǵandar sanatynan shyqty. Oblysta jalpy 62,8 myń adam jumyspen qamtýdyń belsendi sharalaryna tartyldy, 1 myń adam kásipkerlikti damytýǵa mıkrokredıtter aldy, onyń ishinde kásipkerlikti damytý úshin 74 kópbalaly otbasy, múgedektigi bar tulǵalar jáne jastar shaǵyn nesıeler aldy. Sondaı-aq, bıznes ıdeıany iske asyrýǵa 200 aılyq eseptik kórsetkish kóleminde 1,2 myń grant berildi, onyń ishinde 120 kópbalaly otbasy aldy. AÁK-niń birjolǵy tólem esebinen 5439 adam óz isin ashty, onyń ishinde 1909 adam - kópbalaly ana», – dedi Ásııa Quralqyzy. Alaıda, AÁK-ti zańsyz taǵaıyndaýǵa alyp kelgen 18 myńnan astam otbasynyń óziniń naqty tabysyn jasyrǵandyǵy anyqtalǵan. Nátıjesinde oblysta júrgizilgen monıtorıngtiń qorytyndysy boıynsha 3 mlrd teńgege jýyq qarjy únemdelip, artyq tólengen 650 mln.teńgeniń 38,8 mln teńgesi qaıtarylyp otyr.
