Túrkistan oblysynda 800 myń adam koronavırýsqa qarsy vaktsına aldy
Elimizdegi egý kórsetkishi boıynsha Túrkistan oblysy kósh bastap tur. Sońǵy málimetter boıynsha, vaktsınanyń birinshi quramyn 830 myńǵa jýyq adam qabyldady. Al ekinshi komponenin 640 myń adam saldyrǵan.
Búginde óńir turǵyndary reseılik «Spýtnık V», otandyq QazVac, Sinopharm kompanııasynyń HayatVax ekpesi, Qytaıdyń CoronaVac jáne Sinopharm kompanııasynyń Vero Cell vaktsınasyn qabyldaı alady.
Búginde óńir «jasyl aımaqta» tur. Ótken táýlikte 45 azamat qaterli COVID-19 indetiniń quryǵyna ilikti. Táýliktik ósim 0,33 % quraıdy. Qazir ınfektsııalyq statsıonarlarda barlyǵy 2020 oryn bar. Munda 724 naýqas em qabyldap jatyr.
Jalpy pandemııa beleń alǵaly koronavırýs juqtyrǵandar sany 13 653 adamǵa jetti. 7157 naýqasta aýrýdyń belgileri bolmaǵan. Sondaı-aq, búginge deıin 1 008 452 adamnan PTR synamasy alynǵan. Sońǵy táýlikte zerthanalarda 2392 adam tekserildi.
