Túrkistan oblysynda 80 myńǵa jýyq oqýshyny planshet jáne noýtbýktarmen qamtý kózdelgen
TÚRKІSTAN. QazAqparat - Búginde Túrkistan oblysynda 912 jalpy bilim beretin mektep bar, bul mektepterde 502 737 bala bilim alady. Onyń ishinde 446 109 (89,0%) oqýshy qashyqtan oqytý formatyna kóshken, dep habarlaıdy QazAqparat tilshisi Túrkistan oblysynyń Óńirlik kommýnıkatsııalar qyzmetine silteme jasap.
Oqýshylardyń qashyqtan bilim alýyn qamtamasyz etý úshin aldyn ala júrgizilgen monıtorıngke sáıkes oblysta 79 214 oqýshyǵa kompıýterlik tehnıka men planshetter qajettigi anyqtaldy.
Bul maqsatta QR Úkimeti rezerviniń qarajatynan 57190 (7711 planshet, 5952 kompıýter, 43527 noýtbýk) kompıýterlik qurylǵy satyp alý boıynsha tıisti jumystar júrgizilip, onyń 4000 danasy oqý jylynyń alǵashqy aıynda oqýshylarǵa úlestirildi.
Sonymen qatar, aǵymdaǵy jyldyń 6 qazany kúni qalǵan 3711 planshet qabyldap alynyp, 2 aıǵa arnalǵan «Bilim» tarıfi qosylǵan sım-kartalar (tele-2, bılaın, aktıv, altel) qosa berildi.
Aıta keteıik, Úkimet rezerviniń qarajatynan alynatyn 49 479 qurylǵy (5952 kompıýter, 43527 noýtbýk) aǵymdaǵy jyldyń 30 qazanyna deıin alynyp, oqýshylarǵa beriletin bolady.
Qashyqtan oqytýdy tıimdi uıymdastyrý maqsatynda alynatyn kompıýterler men noýtbýkter negizinen az qamtamassyz etilgen jáne kópbalaly otbasylarǵa, jetim jáne ata-anasynyń qamqorlyǵynsyz qalǵan, erekshe bilim alýdy qajet etetin balalarǵa úlestiriledi. Tehnıkalardyń ár oqýshyǵa jetkizilýin Túrkistan oblysy adamı áleýetti damytý basqarmasy janynan qurylǵan jetekshi top músheleri qadaǵalaýda.
