Túrkistan oblysynda 80 myń gektarǵa jýyq sýarmaly jer aǵyn sýmen qamtylady
TÚRKІSTAN. QazAqparat - Túrkistan oblysynda 80 myń gektarǵa jýyq sýarmaly jer aǵyn sýmen qamtylady, dep habarlaıdy QazAqparat oblys ákiminiń baspasóz qyzmetine silteme jasap.
Bul týraly oblystyq máslıhattyń kezekti 38 sessııasynda Túrkistan oblysynyń ákimi Ómirzaq Shókeev málimdedi.
Ákimniń aıtýynsha, Túrkistan oblysyn damytýǵa Úkimet erekshe ekpin berip otyr. Osy maqsatta oblys ortalyǵynda azyq-túlik pen jasyl beldeýlerdi qalyptastyrý, dıqandardy aǵyn sýmen qamtamasyz etý, Túrkistan qalasyn kógaldandyrý jáne abattandyrý úshin serpindi jobalar iske asyrylýda.
Joǵaryda atalǵan jobalar aıasynda óńir basshysynyń tikeleı bastamasymen Úkimettik deńgeıinde eki qaýly qabyldandy.
Birinshi, QR Úkimetiniń qaýlysymen 5 sý nysany jáne QR Qarjy mınıstrligi buıryǵymen «Qaraspan» sý toraby oblystyq menshikke kerı qaıtaryldy. Nátıjesinde, Túrkistan oblysy Ordabasy, Otyrar, Báıdibek aýdandary jáne Arys, Kentaý qalasy óńirleriniń 78,8 myń gektar sýarmaly jerlerin aǵyn sýmen turaqty jáne ýaqytyly qamtamasyz etiletin bolady.
Joǵaryda atalǵan sý nysandaryn tıimdi paıdalaný, qorǵaý, kútip ustaý, damytý maqsatynda oblys ákiminiń qaýlysymen «Bógen arnasy» memlekettik mekemesi quryldy. Búgingi kúnniń ózinde jalpy quny 29,4 mlrd teńgeni quraıtyn 4 jobany júzege asyrý jumystary bastaldy.
Olar: Túrkistan magıstraldy kanalyna Syrdarııa ózeninen mashınalyq ádispen sý berý qurylysyn júrgizý arqyly qosymsha 80 mln tekshe metr aǵyn sý jetkizý jobasy; Túrkistan magıstraldy kanalyn betonmen qaptaý jumystaryn júrgizý arqyly qosymsha 60 mln tekshe metr aǵyn sýdy únemdeý jobasy; «Keńsaı-Qosqorǵan-2» sý qoımasyn salyp, 15 mln m³ aǵyn sý jınaý jobasy; Arys-Túrkistan massıvinde jaramsyz bolyp qalǵan 145 tik uńǵymany qaıta qalpyna keltire otyryp 34,7 mln m³ qosymsha aǵyn sýmen qamtamasyz etý jobasy.
Qazirgi tańda osy jobalar boıynsha oblystyq bıýdjetten jobalyq smetalyq jáne tehnıka-negizdemelik qujattaryn ázirleýge qarjy qarastyrylyp jatyr.
Atalǵan jobalardy iske asyrý nátıjesinde sharýalarǵa jetkiziletin aǵyn sý kólemi 196 mln m³ ulǵaıyp, qosymsha 1 500-den astam jańa jumys oryndary ashylatyn bolady.
Ekinshi qaýly boıynsha, «Túrkistan oblysynyń áleýmettik-ekonomıkalyq damytýdyń 2024 jylǵa deıingi jospary» Úkimet tarapynan bekitilip, oblys ortalyǵyn azyq-túlik qaýipsizdigimen qamtamasyz etý maqsatynda, Túrkistan qalasy aýmaǵynan radıýsy 15 shaqyrymda azyq-túlik jáne jasyl beldeýlerin qalyptastyrý jobalary iske asyrylýda. Beldeý aqyldy tehnologııalardy qoldana otyryp, ǵalymdardyń súıemeldeýimen 2 kezeńmen júzege asady. Atap aıtqanda, 1-kezeń - Túrkistan-Shymkent baǵytynda 1 myń ga alqapty qamtıdy. Onyń jumystary bastalyp ketken. 2-kezeń 2020 jyly Túrkistan-Shymkent, Túrkistan-Otyrar jáne Túrkistan-Kentaý, Túrkistan-Qyzylorda baǵyttarynda 10 myń ga alqap qamtylatyn bolady.
Buǵan qosa, osy joba aıasynda jalpy quny 46,1 mlrd teńgeni quraıtyn 8 iri ınvestıtsııalyq jobany iske asyrý josparlanǵan. Onyń ishinde 25 mlrd teńge keshendi jospar aıasynda, 11,5 mlrd teńge jergilikti bıýdjetten sýbsıdııalaýǵa, qalǵan 9,5 mlrd teńge jeke ınvestıtsııalar esebinen júzege asyrylatyn bolady.
