Túrkistan oblysynda 80 bas mal urlaǵan kúdikti Nur-Sultan qalasynda ustaldy

NUR-SULTAN. QazAqparat – Túrkistan oblysy Báıdibek APB-ne jergilikti turǵynnan mal urlyǵyna qatysty habarlama kelip túsedi. Aryzdanýshynyń málimdeýi boıynsha, qorasynan belgisiz bireýler onyń 82 bas usaq malyn qoldy etken, dep habarlaıdy oblystyq PD baspasóz qyzmeti.

Jábirlenýshige keltirilgen shyǵynnyń jalpy quny 3 jarym mıllıon teńgege jýyq. Bolǵan jaıtty polıtseıler tez arada QR QK 188-baby «urlyq» boıynsha sotqa deıingi tergep-tekserý tizilimine tirkeıdi.

Atalǵan mal urlyǵy qylmysyn jedel ashý maqsatynda Túrkistan oblysy Polıtsııa departamentiniń Báıdibek APB qyzmetkerlerinen jedel-izdestirý toby qurylady. Bilikti polıtseıler jaqyn mańnyń barlyǵyn aralap, mal tasymaldaıtyn avtokólikterdi tekserip, kýágerlerden suraq-jaýaptar alyp, aımaqty tintip shyǵady. Sonyń nátıjesinde mal urlyǵyna qatysy bar kúdikti tulǵa men onyń kólikke mal tıegeni anyqtalady. Alaıda urlyq qylmysyna qatysty tulǵa turǵylyqty mekenjaıynda bolmaı shyǵady. Kúdikti birneshe aıdan soń Nur-Sultan qalasynda qydyryp júrgen jerinen ustaldy.

Qazirgi tańda ol qamaýda. Ustalǵan azamat Báıdibek aýdanynyń jergilikti turǵyny. Buryn sońdy birneshe ret mal urlyǵy boıynsha sotty bolǵan. Tergeý barysy kórsetkendeı, kúdikti urlaǵan maldarynyń barlyǵyn satyp, aqshany óz qajettiligine jaratyp jibergen.

Tergep-tekserý amaldary áli de jalǵasýda. Іs aıaqtalǵan soń, qujattardyń barlyǵy tolyǵymen sotqa joldanatyn bolady.