Túrkistan oblysynda 8-synyp oqýshysy koronavırýs týraly jalǵan habar taratqan
TÚRKІSTAN. QazAqparat – Túrkistan oblysynda koronavırýs týraly jalǵan aqparat taratqan jasóspirim ustaldy. Kentaý qalasyna qarasty Qarnaq aýylynyń kámelet jasyna tolmaǵan turǵyny áleýmettik jeli arqyly jurtqa indet taralǵany týraly jalǵan habarlama joldaǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, 28 naýryzda Kentaý qalalyq polıtsııa bólimine áleýmettik jelide Qarnaq aýylynda koronavırýs juqtyrý týraly aqparat taraǵany jóninde habarlama túsken.
Osy aqparatty taratqan adamdy anyqtaý úshin polıtsııa bóliminde jedel-tergeý toby qurylyp, atalǵan jaıt QR QK 274-baby «Kórineý jalǵan aqparat taratý» boıynsha tirkelgen.
Jedel-izdestirý sharalarynyń barysynda kentaýlyq polıtseıler jasóspirimdi ustady. Ol osy aýyldaǵy mekteptiń 8-synyp oqýshysy bolyp shyqty. Jasóspirim qylmysyn tolyq moıyndap, istegen isine ókinetinin aıtqan. Jasóspirim ata-anasynyń qadaǵalaýyna tapsyrylyp, olarmen tıisti profılaktıkalyq áńgime júrgizildi.
«Qazirgi ýaqytta polıtsııa qyzmetkerleri oqıǵanyń mán-jaıyn anyqtap jatyr. Sotqa deıingi tergeý amaldary júrgizilýde. Endigi jerde jasóspirimniń ata-anasy ákimshilik jaýapkershilikke tartylady» delingen habarlamada.
