Túrkistan oblysynda 8 mektep jańa oqý jylyna daıyn emes

TÚRKІSTAN. QazAqparat- Túrkistan oblysynda 8 mektep jańa oqý jylyna daıyn emes. Bul týraly Túrkistan oblysy bilim salasynda sapany qamtamasyz etý departamenti basshysynyń orynbasary Janar Qasymova málimdedi, dep habarlaıdy QazAqparat tilshisi.

Búginde óńirdegi kúrdeli jóndeý jumystary júrgizilip jatqan 14 mekteptiń 9-y tamyz aıynyń sońynda paıdalanýǵa beriledi.

Al, 5 mektepte qurylys jumystary merziminde aıaqtalmaýyna baılanysty, olarda alǵashqy qońyraý soǵylmaýy múmkin.

Atap aıtqanda, Tólebı aýdanyndaǵy «Qaratóbe» jalpy orta mektebi, Túlkibas aýdanyndaǵy A.Orazbaeva atyndaǵy jalpy orta mektebi, Ordabasy aýdanyndaǵy E.Ernazarov atyndaǵy jalpy orta mektebi, Kentaý qalasyndaǵy №24 T.Rysqulov atyndaǵy jalpy orta mektebi, Tólebı aýdanyndaǵy «Qostóbe» mektebi oqýshylardy qabyldaýǵa daıyn emes.

Sondyqtan atalǵan mekteptiń oqýshylary kórshi bilim ordalaryna tasymaldanyp oqytylady.

Al, Saryaǵash aýdanyndaǵy №78 jalpy orta mektebi, Qazyǵurt aýdanyndaǵy №1 jalpy orta mektebi, Tólebı aýdanyndaǵy Lashkar Tájibaev atyndaǵy shaǵyn jınaqty jalpy orta mektebi jańa oqý jylynda 5-11 synyp oqýshylaryn qabyldaı almaıdy.

Sebebi, bul mektepterdiń bilim berý qyzmetimen aınalysýǵa lıtsenzııasy nemese lıtsenzııaǵa qosymshasy berilmegen.

«Zańdy tulǵa retinde memlekettik tirkeýden ótken kezden bastap alty aı ishinde bilim berý qyzmetimen aınalysýǵa lıtsenzııa ala almaǵan jaǵdaıda bilim berý uıymy sot tártibimen taratylady («Bilim týraly» QRZ 40-baby, 2-1 – bóligi). Departament tarapynan Ákimshilik quqyq buzý kodeksiniń 463-baby 1-bóligi boıynsha hattama toltyrylyp, materıaldar Saryaǵash, Qazyǵurt, Tólebı aýdandarynyń sotyna joldandy»,-deıdi Janar Qasymova.