Túrkistan oblysynda 78 mekteptiń qurylysy júrgizilýde

TÚRKІSTAN. QazAqparat - Túrkistan oblysy boıynsha búginde 78 mekteptiń qurylysy júrgizilýde. Jyl sońyna deıin 40 mekteptiń qurylysy tolyq aıaqtalady, dep habarlaıdy QazAqparat tilshisi.

Oblystyq Adamı áleýetti damytý basqarmasy basshysy Raqymbek Jolaevtyń aıtýynsha, jańadan salynyp jatqan mekteptiń 70-i oblystyq bıýdjetten boı kóterýde. 8-i «Aýyl-El besigi» jobasymen qurylysy júrgizilýde. 6 apatty jáne 4 úsh aýysymdy mektep bar bolsa, onyń ishinde bıyl 2 apatty jáne 1 úsh aýysymdy mekteptiń máselesi sheshiledi.

«Sonymen qatar, mektepterdi ishki ájethanalarmen qamtamasyz etý boıynsha 2020 jyly 679 mektep, 2021 jyly 59 mekteptiń ishki ájethanalary retke keltirildi. Qalǵan 18 mekteptiń ishki ájethanalarynyń máselesi jyl sońyna deıin tolyǵymen sheshiletin bolady. Mekteptegi oqýshylardyń qaýipsizdigin qamtamasyz etý maqsatynda oblysta 906 memlekettik mektepte tolyǵymen beınebaqylaý júıesi ornatylǵan», - dedi basqarma basshysy.

Sondaı-aq, oblystaǵy bilim mekemelerin mamandandyrylǵan kúzet jáne «Dabyl batyrmalarymen» qamtýdy kezeń-kezeńimen sheshý josparlanýda.