Túrkistan oblysynda 70-ke tarta jylqyny aıdap áketken barymtashy ustaldy
TÚRKІSTAN. QazAqparat - Túrkistan oblysynda mal urlady degen kúdikpen jergilikti turǵyn ustaldy. Qazirgi tańda onyń jaıylymdardan 70-ke tarta jylqyny qoldy etip, jábirlenýshilerge 30 mln teńge shamasynda shyǵyn keltirgeni anyqtalyp otyr, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, sezikti qylmysyn Báıdibek aýdanynyń aýmaǵynda jasap kelgen.
«Báıdibek aýdandyq polıtsııa bólimshesine jergilikti turǵyn jaıylymda júrgen 30 jylqysynyń urlanǵanyn aıtyp aryzdanǵan. Dál osy tektes aryzben polıtsııaǵa taǵy birneshe adam kelgen. Osydan keıin oblystyq PD krımınaldy polıtsııa basqarmasynyń tájirıbeli qyzmetkerlerinen arnaıy jedel-izdestirý toby qurylyp, barymtashylardy izdestirgen. Nátıjesinde Túrkistan qalasynan osy qylmysqa qatysy bar degen kúdikti ustaldy. Tergeý barysynda onyń Báıdibek aýdanynyń aýmaǵynda mal urlyǵyna qatysty 4 qylmys jasaǵany anyqtaldy. Qazirgi tańda osy oqıǵa boıynsha Qylmystyq kodekstiń 188-babymen («Urlyq») is qozǵalyp, sotqa deıingi tergeý amaldary júrgizilip jatyr» delingen habarlamada.
Foto: kstnews.kz
