Túrkistan oblysynda 7 jańa medıtsınalyq nysan salynýda
NUR-SULTAN. QazAqparat – Medıtsınalyq ınfraqurylymdy damytý maqsatynda Túrkistan oblysynda 78,5 mlrd. teńgege 7 jańa nysan salynyp jatyr. Óńirdegi 8 emdeý nysandary kúrdeli jóndeýden ótýde. Onyń 6-y paıdalanýǵa berildi. Bul jaıly densaýlyq saqtaý salasynyń keńeıtilgen alqa otyrysynda aıtyldy, dep habarlaıdy oblys ákimdiginiń baspasóz qyzmeti.
Túrkistan oblysy ákiminiń orynbasary Arman Sábıtovtyń qatysýymen ótken alqa otyrysynda Qoǵamdyq densaýlyq basqarmasy 2020 jylǵy qyzmetiniń qorytyndylary shyǵarylyp, perspektıvalary talqylandy. Oblys ákiminiń orynbasary Basqarmanyń qyzmetine oń baǵa berip, birqatar naqty tapsyrmalar júktedi.
«Statıstıkalyq derekterge súıensek, halyq sanynyń ósýi birinshi kezekte týý kórsetkishine jáne ana men bala densaýlyǵyna tikeleı táýeldi. Oblysta ana men bala ólimin tómendetý úshin medıtsınalyq kómektiń qoljetimdiligin arttyryp, áleýmettik ahýaldy túzetý baǵytynda birshama ister atqaryldy. Búginde Túrkistan oblysy ana ólimi boıynsha respýblıkada 16.3 kórsetkishimen eń sońǵy orynda. Sábı ólimi boıynsha elimizdegi kórsetkish 7.1. Bul dárigerlerdiń tynymsyz eńbeginiń jemisi. Sondaı-aq, oblys boıynsha negizgi medıtsınalyq-demografııalyq kórsetkishteriniń jaqsarǵanyn atap ótken jón. Osylaısha, sońǵy jyldary óńirde ómir súrý uzaqtyǵy artyp, jalpy ólim-jitim, týberkýlez 26.5% tómendegen. Qaterli isik aýrýlary, qan aınalymy júıesi aýrýlary da edáýir azaıdy», – dedi óz alqa otyrysynda sóz alǵan Qoǵamdyq densaýlyq basqarma basshysy Marat Pashımov.
Túrkistan oblysynda epıdemıologııalyq jaǵdaı turaqty. Turaqty negizde oblysta koronavırýstyq ınfektsııasy bar naýqastardy (COVID-19) emdeýge jatqyzý úshin myńǵa jýyq ınfektsııalyq jáne karantındik tósek uıymdastyrylǵan. Memlekettik PTR zerthanalarynyń sany úsh esege kóbeıtildi.
Sonymen qatar, jyljymaly medıtsınalyq keshenniń 12 jıyntyǵy satyp alyndy, nátıjesinde óńirlerdi jyljymaly medıtsınalyq keshenmen qamtamasyz etý kórsetkishi 100% qurady. Jedel járdem qyzmeti 77 kólikpen tolyqty. Osylaısha jedel járdem parki 96% -ǵa jańardy.
Jıyn qatysýshylaryna jaqyn bolashaqta júzege asyrylýy tıis josparlar men mindetter aıqyndaldy. Bul – pandemııanyń ekinshi tolqynyna dárilik zattarǵa qoljetimdilik, tósek oryn máselelerin tolyq sheshý.
