Túrkistan oblysynda «7-20-25» aıasynda 6 kópqabatty úı salynyp jatyr
TÚRKІSTAN. QazAqparat - Túrkistan oblysynda aǵymdaǵy jyly «7-20-25» baǵdarlamasy negizinde 6 kópqabatty turǵyn úıdiń qurylysy júrgizilýde. Bul týraly óńirlik kommýnıkatsııalar qyzmetinde ótken brıfıngte oblystyq qurylys basqarmasynyń basshysy Quttybek Jamashev málim etti, dep habarlaıdy QazAqparat.
Basqarma basshysynyń sózinshe, jeke salýshylar arqyly júzege asyrylyp jatqan nysandar 360 páterli bolady. Jalpy aýmaǵy - 18,6 myń sharshy metrdi quraıdy. Atalǵan úıler 2019 jyly paıdalanýǵa beriledi dep kútilýde.
Sonymen qatar, 2018 jyly oblysta 172 ınvestıtsııalyq jobanyń iske asyrylýyna 30,6 mlrd.teńge qaralǵan. Jyl sońyna deıin 71-in paıdalanýǵa tapsyrý josparlansa, búgingi tańda 11 nysannyń qurylysy aıaqtalyp paıdalanýǵa berilgen. Qalǵan 101 nysannyń qurylysy 2019 jylǵa ótedi.
«Áleýmettik sala boıynsha bilim berý salasyna jalpy 83 nysan qurylysyna 15,9 mlrd. teńge qaralǵan. Onyń ishinde respýblıkalyq bıýdjetten qurylysy josparlanǵan 16 mekteptiń bıyl 12-in tapsyrý kózdelgen. Qalǵan 4 nysannyń qurylysy 2019 jylǵa ótedi. Al oblystyq bıýdjetten qaralǵan 11,5 mlrd. teńgege 67 nysan qurylysyn júrgizip, onyń ishinde aǵymdaǵy jyly 28 nysandy paıdalanýǵa berý mejelenip otyr. Qalǵan 39 mekteptiń qurylysy 2019 jylǵa ótedi», - dedi Quttybek Rahmattýllauly. 
Budan ózge, densaýlyq saqtaý salasynda 11 nysannyń qurylys jumystary júrgizilip, 2018 jyly 1 dárigerlik ambýlatorııany paıdalanýǵa berý josparlanǵan. Qalǵan 10 nysan 2019 jylǵa ótedi. Mádenıet salasynda 2 mádenıet úıi men 1 murajaıǵa qosymsha nysannyń qurylysy júrgizilip, búgingi tańda 2 nysan paıdalanýǵa berilgen. Sport salasynda 3 nysan qurylysy júrgizilýde, jyl sońyna deıin barlyǵy paıdalanýǵa beriletin bolady.
