Túrkistan oblysynda 63 jas mıllıoner atandy
Mıllıoner atanǵan jastar arasynda kentaýlyq Alýa Tursynhan da bar.
Ol ózi usynǵan «kóprettik jórgek» jobasy aıasynda kópbalaly jáne az qamtylǵan otbasylarǵa tegin jórgekter taratpaq.
«Eń bastysy ekologııalyq taza, bala densaýlyǵyna allergııalyq áseri joq. Bir rettik jórgek - 200 teńge turady. Bir kúnde 4 jórgek aýystyrsańyz - 800 teńge. Aılyq shyǵyny 24 myń teńgeni quraıdy. Bir úıde 3 bala bolsa, aıyna 50-70 myń teńge jumsalady. Bizdiń jórgekter arqyly ár otbasy 50 myń teńgege deıin únemdeı alady. Al biz joba aıasynda kópbalaly jáne az qamtylǵan otbasylarǵa jórgekterdi tegin taratamyz», - deıdi ol.
Túrkistan oblysy boıynsha «Zhas Project» jobasynyń jetekshisi Dinıslam Bımahanbetov aldaǵy ýaqytta granttyq jobalardyń sanyn ulǵaıtý josparlanyp otyrǵandyǵyn aıtty.
«Joba aıasynda múmkindigi shekteýli jandarǵa arnalǵan ońaltý ortalyǵy jumys isteıdi, tserebraldy sal aýrýy bar balalarǵa emdik atpen júrý sabaqtary ótkiziledi, sabyndar, keptirilgen jemisterden jasalǵan eko chıpster men ınkýbatsııa arqyly jumyrtqalar óndirilip jatyr. Óńirimizde jobanyń jastar arasynda úlken suranysqa ıe bolýyna baılanysty aldaǵy ýaqytta granttyq jobalardyń sanyn ulǵaıtýdy usynamyz» - dedi ol.
«Zhas project» jobasy aıasynda Túrkistan oblysynda 63 joba iriktelip, árbir qatysýshyǵa óz bastamalaryn iske asyrý úshin 1 000 000 teńgege deıin grant bólindi.
Joba barysynda shaǵyn granttardy iske asyrý qorytyndysy boıynsha Túrkistan oblysynda 18 bilim kýrsy, 12 sport sektsııasy, 6 naýbaıhana jáne kondıterlik sheberhana, 6 tigin sheberhanasy, 5 logopedııa ortalyǵy, 4 sulýlyq salony, 3 massaj kabıneti, 3 demalys ortalyǵy iske qosyldy.
