Túrkistan oblysynda 60-qa tarta eldi meken áli jaryqsyz otyr
TÚRKІSTAN. QazAqparat - Túrkistan oblysynda 60-qa tarta eldimeken eki aptaǵa jýyq ýaqyttan beri jaryqsyz otyr. Qatty boran saldarynan qarańǵylyq qushaǵynda qalǵan aýyldarda bes myńnan asa elektr baǵanalary qulaǵan bolatyn, dep habarlaıdy QazAqparat tilshisi.
Túrkistan oblystyq Energetıka jáne turǵyn úı kommýnaldyq sharýashylyq basqarmasynyń bólim basshysy Roza Sarıevanyń aıtýynsha, qatty borannan óńirdegi Ordabasy, Otyrar, Báıdibek aýdandary men Arys, Kentaý, qalalaryndaǵy 93 eldimekenniń jaryǵy sóngen. Onda 36 myńǵa tarta tutynýshy turady. Qazir sońyn tek 34 aýylynda ǵana baǵanalar qalpyna keltirilgen. Qalǵan 59 eldimekenge naqty qashan jaryq beriletini ázirge belgisiz.
«Qaptty daýyldan óńirdegi 5105 elektr baǵanasy qulaǵan bolatyn. «KEGOC» kompanııasy tarapynan 243 baǵananyń 110-y retke keltirilgen. «Ońtústik jaryq tranzıt» tarapynan 651 baǵana qalpyna keltirildi. Sondaı-aq, Kentaý, Túrkistan qalalary men Sozaq aýdanyn sapaly elektrmen qamtıtyn jelisi qulaǵan. Qazirgi tańda bul jeli qalpyna keltirildi. Bul jumystarǵa «KEGOC» Aktsıonerlik qoǵamynan 192 jumysshy jumyldyrylǵan. Al, «Ońtústik jaryq tranzıt» tarapynan 307 adam men 72 arnaıy tehnıka, 72 brıgada tartylǵan. Dese de, atalǵan eldimekenderde qatty jańbyr jaýdy. Nátıjesinde baǵanalar turǵan jerler batpaq, laı boldy. Sol jerde tehnıka kishkene qınalyp jumys istep jatyr. Jaryq berýshi mekemeniń málimetinshe, osy eldimekenderde baǵanalardy qalpyna keltirý men úzilgen symdardy jalǵaý jumystary 15-shi sáýirge deıin sozylýy múmkin dep otyrmyz. Biraq jaýyn-shashyn azdaý bolsa, odan da erte bitirýi yqtımal»,- deıdi Roza Sarıeva.
Aıta keteıik, tabıǵı apattan qulaǵan 5 myńnan asa elektr baǵanasynyń tórt myńǵa jýyǵy 20 kılovolttan asa tok ótetin joǵary kerneýli jelileri sanalady. Boran saldarynan 440 mln teńge shamasynda shyǵyn kelgen.
Eske salsaq, aýa raıynyń qolaısyzdyǵyna baılanysty Túrkistan oblysynyń bes aýdanyndaǵy eldi mekender jaryqsyz qalǵan bolatyn.
