Túrkistan oblysynda 6 tonnaǵa jýyq esirtki tárkilendi

TÚRKІSTAN. QazAqparat - «Kóknár» jáne «Dopıng» jedel aldyn alý is-sharalary aıasynda esirtkiniń zańsyz aınalymyna qatysty 62 qylmys tirkeldi, dep habarlaıdy QazAqparat Túrkistan oblystyq polıtsııa departamentiniń baspasóz qyzmetine silteme jasap.

Onyń ishinde 18 esirtki zatyn ótkizý, 3 asa iri kólemde esirtkini saqtaý faktileri bolsa, odan bólek esirtki ósimdikteriniń 38 alqaby joıyldy. Polıtsııa qyzmetkerleri tárkilegen esirtkiniń jalpy salmaǵy - 6 tonnaǵa jýyq, onyń ishinde 5,5 kg astamy - geroın.

Atalǵan is-sharalardyń negizgi maqsaty - esirtki qylmysynyń aldyn alý jáne jolyn kesý, kúdiktilerdi esirtkini saqtaý jáne ótkizý kezinde ustaý, quramynda esirtkisi bar ósimdikterdiń zańsyz egilýi men esirtkini jetkizý arnalaryn jáne basqa da quqyq buzý faktilerin anyqtaý men joıý.

Mysaly, 17 qyrkúıek kúni Túrkistan oblysy polıtsııa qyzmetkerleri jedel izdestirý is-sharasy kezinde Saıram aýdanynyń turǵynyn ustady. Kúdiktini tintý kezinde jedel ýákilder marıhýanaǵa uqsas ósimdik tektes esirtki zatyn tapty. Odan ári ustalǵan kúdiktiniń úıinen taǵy birneshe polıetılen paket pen esirtki oramasy tárkilendi. Saraptamaǵa sáıkes, alynǵan esirtki zaty - jalpy salmaǵy 5 kg-dan asatyn marıhýana bolyp shyqty.

Atalǵan jaıt QR QK 296-baby jáne 297-baby boıynsha tirkeldi. Kúdikti qamaýǵa alyndy. Sotqa deıingi tergeý amaldary júrgiziledi.

Sondaı-aq, jedel aldyn alý is-sharasynda Túrkistan oblysy PD EQQKB jedel ýákilderi Kentaý qalasynyń turǵynyn ustady. Ustalǵan kúdiktiniń úıin tintý kezinde tártip saqshylary marıhýanaǵa uqsas ósimdik tektes eki polıetılen paketti taýyp, tárkiledi. Saraptama qorytyndysy boıynsha, tárkilengen esirtki zaty 1 kg-dan asatyn marıhýana bolyp shyqty.

Qazirgi ýaqytta atalǵan jaıt boıynsha QR QK-niń 296-baby boıynsha sotqa deıingi tergeý amaldary júrgizilip jatyr. Kúdikti qamaýǵa alyndy. Polıtsııa qyzmetkerleri kúdiktiniń esirtkini qandaı maqsatpen saqtaǵanyn, sondaı-aq basqa da qylmystardyń tolyq mán-jaıyn anyqtaýda.