Túrkistan oblysynda 6 tonnadan astam esirtki tárkilendi
TÚRKІSTAN. QazAqparat - Túrkistan oblysynyń Polıtsııa departamenti Esirtkige qarsy kúres basqarmasynyń qyzmetkerleri bir jylda zańsyz esirtki aınalymyna qatysty 163 qylmysty ashyp, 200-den asa qylmystyq quqyqbuzýshylyqty anyqtady. Óńirde zańsyz aınalymnan 6 tonnadan astam esirtki zaty tárkilendi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, tártip saqshylary jedel-izdestirý sharalarynyń barysynda esirtki satýdyń 66 oqıǵasyn anyqtaǵan. Esirtki kontrabandasynyń 25 jaıtyna qatysty qylmystyq is qozǵap, 50-den astam esirtki ósirý alqaptary joıyldy.
«Tólebı APB-niń qyzmetkereleri esirtki satýmen aınalysqan degen kúdikpen aýdannyń 44 jastaǵy turǵynyn ustady. Tergeý barysynda kúdiktiniń marıhýanany satý men saqtaýmen aınalysqandyǵy anyqtalǵan. Atalmysh jaıt QR Qylmystyq kodeksiniń 297 «Esirtki, psıhotroptyq zattardy sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» baby boıynsha SDTBT-ge tirkeýge alyndy. Búgingi tańda sottyń úkimimen 44 jastaǵy sottalýshy 5,5 jylǵa bas bostandyǵynan aıyryldy», delingen habarlamada.
