Túrkistan oblysynda 6 depýtat ókilettigin toqtatý jóninde ótinish berdi

TÚRKІSTAN. QazAqparat - Túrkistan oblystyq máslıhatynda 6 depýtattyń ókilettilikteri toqtatyldy. Mundaı sheshim máslıhattyń kezekten tys 29-shy sessııasynda qabyldandy, dep habarlaıdy QazAqparat. 

Máslıhatta sóz sóılegen Oblystyq saılaý komıssııasynyń tóraǵasy Álibek Ómirálıev Shymkent qalasynan saılanǵan depýtattardan osyndaı ótinish túskenin jetkizdi. 

«Túrkistan oblystyq máslıhaty alty depýtatynyń óz ótinishteri boıynsha ókilettigin merziminen buryn toqtatý týraly usynysty qaraýdy suraımyn. Olar - №4 saılaý okrýginen saılanǵan Jumaǵalı Bilisbekov, №5 saılaý okrýginen Qaırat Moldaseıitov, №6 saılaý okrýginen Qılybek Turlybek, №7 okrýgten Arman Berdenov, №8 saılaý okrýginen Baharam Abdýkarımov jáne №9 saılaý okrýginen Ráshkúl Ospanalıeva».

Sessııa barysynda, sondaı-aq 2018-2020 jyldarǵa arnalǵan oblys bıýdjetin naqtylaý, oblys ákimdigi quramyna ózgerister engizý máseleleri de qaraldy. Oblys ataýynyń ózgerýine baılanysty Túrkistan oblysynyń Qurmetti azamaty ataǵyn berý qaǵıdasy, Túrkistan oblysynyń Qurmet gramotasymen marapattaý týraly erejeleri bekitildi.