Túrkistan oblysynda 59 qyzmet túriniń tarıfteri tómendetilgen

TÚRKІSTAN. QazAqparat – Túrkistan oblysynyń tutynýshylary tarıfterdiń tómendeýinen 3 mlrd-tan astam qarjy únemdegen. Bul týraly Tabıǵı monopolııalardy retteý komıtetiniń Túrkistan oblysy boıynsha departamenti basshysynyń mindetin atqarýshy Qymbat Beısenov aıtty, dep habarlaıdy QazAqparat tilshisi.

Túrkistan oblysynda ótken jyldyń qańtar aıynan bastap 59 qyzmet túri boıynsha tabıǵı monopolııa sýbektileriniń tarıfteri tómendetilgen. Nátıjesinde halyqtyń kommýnaldyq qyzmetke tóleıtin qarajaty meılinshe únemdelgen. Qymbat Beısenovtyń aıtýynsha, 2020 jyldyń 1 qańtaryndaǵy jaǵdaı boıynsha oblysta 116 qyzmet túrimen aınalysatyn 93 tabıǵı monopolııa sýbektileri engizilgen. Atap aıtqanda, 3-i — elektr energııasyn tasymaldaý, 10-y —jylýmen qamtamasyz etý, 73-i —sýmen jabdyqtaý, 15-i — sý burý, 4-i — gaz tasymaldaý jáne 11-i — kirme joldary qyzmetteri boıynsha.

«Búgingi tańda oblys boıynsha jylýmen jabdyqtaýshy 6 memlekettik kommýnaldy kásiporyn jumys atqarýda. 2020 jyldyń 1 qańtarynan bastap jylýmen jabdyqtaý tarıfteri orta eseppen 3-17 % aralyǵynda tómendedi. Sýmen jabdyqtaý tarıfteri orta eseppen oblysta 0,1-2% arzandaǵan. Al elektr energııasymen jabdyqtaý qyzmeti boıynsha 2020 jyldyń 1 qańtarynan bastap tasymaldaý tarıfi 6,64 teńgeden 7 teńgege kóterildi. Al tabıǵı gazben jabdyqtaý qyzmeti boıynsha 2020 jyldyń 1 qańtarynan bastap tasymaldaý tarıfi óz deńgeıinde ózgerissiz qaldyryldy», - dedi Qymbat Beısenov.

Departamenti basshysynyń mindetin atqarýshy sondaı-aq, tabıǵı monopolııa sýbektileriniń 2018 jylǵy tarıftik smetalarynyń oryndalýy esebine jasalǵan taldaýlardyń qorytyndysyna toqtaldy. Bul kórsetkishter boıynsha jalpy sommasy 1 mlrd 292 mln teńge kóleminde ótemdik tarıfter bekitilip, halyqqa tómendetilgen tarıfpen qaıtarylǵan.