Túrkistan oblysynda 507 mlrd teńgeni quraıtyn iri jobalar júzege asyrylady
Aıtmuhammed Aldajarovtyń aıtýynsha, «Túrkistan» áleýmettik-kásipkerlik korporatsııasy» aktsıonerlik qoǵamynyń keńsesi janynan búginde «TURKISTAN INVEST», «Tsıfrlandyrý ortalyǵy» jáne «Turaqtandyrý qory» fılıaldary qurylǵan. Qazirgi tańda «Túrkistan» ÁKK» AQ - qurylys, áleýmettik mańyzdy jobalar, týrızm, ınvestıtsııa tartý, tsıfrlandyrý, turaqtandyrý qory syndy baǵyttar boıynsha jumys atqarady.
Brıfıngte «TURKISTAN INVEST» kompanııasynyń basshysy Álibek Nesipbekov te sóz sóılep, Túrkistan oblysynda qolaıly ınvestıtsııalyq jaǵdaı jasalyp jatqanyn atap ótti. Óńirdiń ınvestıtsııalyq áleýetin kóterý maqsatynda qurylǵan ınvestıtsııalyq kompanııanyń jumysymen tanystyrdy.
«19 jobanyń ishinde balamaly elektr energııasyn óndirý boıynsha - 6, aýylsharýashylyq salasyna qatysty - 5, óńdeý ónerkásibine qatysty 8 joba bar. 4 kásiporynnyń bıyl qurylysy bastaldy. Barlyq jobalardy júzege asyrý aıasynda 14 myńǵa jýyq jańa jumys oryndary paıda bolady dep josparlanýda. Olardyń qatarynda jalpy quny 13 240 mln teńgelik «EkoProTeh-Astana» JShS kún elektrostantsııasy - 20 adamdy, quny 95 000 mln teńgeni quraıtyn «Standard Petroleum & Co» JShS munaı óńdeý zaýyty - 1 000 adamdy jumyspen qamtymaq», - dedi Álibek Nesipbekov.
Sonymen qatar brıfıngte ınvestıtsııalyq kompanııa tarapynan áleýetti ınvestorlarǵa aqparattyq qoldaý kórsetý maqsatynda InvestInTurkistan.org ınvestıtsııalyq portaly ázirlengeni aıtyldy. Ondaǵy aqparat aǵylshyn, frantsýz, qytaı,túrik, arab, orys jáne qazaq tilderin kórsetilgen. Bul portaldyń kómegimen ınvestor álemniń kez kelgen buryshynan, kez kelgen ýaqytta ózine qajetti óńirimizdegi ınvestıtsııaǵa qatysy bar aqparatty alý múmkindigine ıe bolady.
