Túrkistan oblysynda 500 myń tonnaǵa jýyq kókónis shetelge eksporttalǵan
TÚRKІSTAN. QazAqparat - Túrkistan oblysyndaǵy egistik jerdiń kólemi 807,4 myń gektarǵa jetken. Bul týraly búgin Óńirlik kommýnıkatsııalar qyzmetinde ótken baspasóz jıynynda oblystyq aýyl sharýashylyǵy basqarmasynyń basshysynyń mindetin atqarýshy Nurbek Badyraqov málimdedi, dep habarlaıdy QazAqparat tilshisi.
Nurbek Badyraqovtyń sózinshe, mundaı jetistikke sharýalar óńirde «Agroónerkásip keshenin damytýdyń 2017 - 2021 jyldarǵa arnalǵan memlekettik baǵdarlamasyn» júzege asyrýdyń arqasynda jetip otyr. «Elbasymyz Nursultan Ábishuly Nazarbaev Qazaqstan halqyna arnaǵan Joldaýynda eńbek ónimdiligin jáne qaıta óńdelgen aýyl sharýashylyǵy óniminiń eksportyn 2022 jylǵa qaraı 2,5 ese kóbeıtý jóninde naqty mindetter qoıyp otyr. Osy rette atalǵan saladaǵy ónim kólemin arttyrý maqsatynda tıisti sharalar qolǵa alynýda. Máselen, bıyl masaqty dándi daqyldardyń egis kólemi 23 myń gektarǵa artyp 227 myńǵa, dándik júgeri 7 myń gektarǵa artyp, 44,3 myńǵa, kókónis, kartop, baqsha daqyldary 7,5 myń gektarǵa artyp, 114 myń gektarǵa jetip otyr», - dedi Nurbek Badyraqov.
Basqarma basshysynyń mindetin atqarýshy sondaı-aq kóktemgi dala jumystaryn júrgizýge Úkimet tarapynan 1 lıtri 158 teńgeden 40,2 myń tonna janar-jaǵarmaı bólingenin atap ótti.
«Búginge deıin janar-jaǵarmaıdyń 28,7 myń tonnasy naryqtaǵy baǵadan 27 teńgege arzandatylyp, agroqurylymdarǵa bólingen. Odan bólek, 50 paıyz jeńildikpen agroqurylymdarǵa 80 myń tonna mıneraldy tyńaıtqyshtar bólindi. Onyń 75 myń tonnasy sharýalarǵa úlestirilgen»,-dedi Nurbek Badyraqov.
Aıta ketsek, bıylǵy jyly aýa raıynyń qýańshylyq bolǵanyna qaramastan, dıqandardyń eseli eńbeginiń arqasynda masaqty dándi daqyldardyń ár gektarynan 17,8 tsentnerden 405 myń tonna ónim jınalǵan. Qazirgi tańda kúrishten basqa dándi-daqyldardy jınaý jumystary tolyǵymen aıaqtalǵan. Kúrishtiń 65 paıyzy orylyp, aqmarjan tonnasy 12 myńǵa jetken.
Maqta daqylynyń gektarynan túsimdiligi 25 tsentnerden, 195,5 myń tonna ónim jınaldy. Kókónis, kartop, baqsha daqyldarynan 2,8 mln. tonna ónim alynyp, rekordtyq kórsetkishke qol jetkizildi. Onyń ishinde, 500 myń tonnaǵa jýyq ónim Reseı, Belarýs, Latvııa, Germanııa memleketterine eksporttalǵan.
