Túrkistan oblysynda 50 myńǵa jýyq oqýshy kompıýtermen qamtylady

TÚRKІSTAN. QazAqparat – Túrkistan oblysynda aımaq basshysy Ómirzaq Shókeevtiń tapsyrmasymen áleýmettik osal toptaǵy balalardyń barlyǵy kompıýtermen qamtamasyz etiletin boldy. Áleýmettik osal top sanatyndaǵy erekshe bilim berýdi qajet etetin jáne jetim, ata-anasynyń qamqorlyǵynsyz qalǵandar men kedeılik sheginen tómen otbasylardyń 49 261 balasyna qajetti tehnıka jetkizilip beriledi, dep habarlaıdy QazAqparat tilshisi.

Oblys ákiminiń tóraǵalyǵymen ótken májilisinde oblystyq Adamı áleýetti damytý basqarmasynyń basshysy Raqymbek Jolaev baıandama jasap, óńirdegi bilim berý salasyndaǵy sheshýdi qajet etetin máselelerdi ortaǵa saldy. Onyń sózinshe aımaqtaǵy 910 mektepte 500 myńǵa jýyq oqýshy bilim alady. Olardyń ishinde 838 eldimekenniń 705-de ınternet, uıaly baılanys júıeleri bar. Al, ınternetsiz ne uıaly baılanys qyzmeti nashar, 2G deńgeıdegi ınterneti bar aýyldarda oqýshylar dástúrli túrde bilim alýy múmkin. Máseleniń sheshimi óńirdegi epıdemıologııalyq jaǵdaıdyń turaqtanýyna baılanysty.

«Birinshi kezekte, biz osy balalardy kompıýterlik tehnıkalarmen qajettiligine qaraı tolyq qamtylady. Ol úshin, Basqarma tarapynan tıisti sanattaǵy oqýshylardy kompıýterlik tehnıkalarmen qamtýdyń «Bir otbasyǵa – bir kompıýterlik tehnıka» prıntsıpindegi algorıtmi ázirlenedi»,-dedi baıandama jasaǵan basqarma basshysy.

Al, jańa oqý jylynda negizgi basymdyq - bilim berý uıymdaryndaǵy qashyqtyqtan oqytýdy uıymdastyrýǵa berilmek. Bilim alý tsıfrlyq Online-mektep, Daryn-Online platformalar arqyly júrgizilmek. Sondaı-aq, muǵalimder sabaqty úı jaǵdaıynda tek kompıýtermen jumys isteıdi.