Túrkistan oblysynda 50-ge jýyq kásipker «Ashyq» jobasyna qatysýǵa ótinim bergen
TÚRKІSTAN. QazAqparat - Túrkistan oblysynda 50-ge jýyq kásipker «Ashyq» jobasyna qatysýǵa ótinim bergen. Bul týraly oblystyq kásipkerler palatasynda ótken saýda jáne qyzmet kórsetý komıtetiniń otyrysynda sóz boldy, dep habarlaıdy QazAqparat tilshisi.
Jıynǵa Túrkistan oblysynyń sanıtarııalyq-epıdemıologııalyq baqylaý departamentiniń mamandary, aýdandarǵa qarasty basqarma ókilderi, kásipkerlik palatasynyń basshylyǵy qatysty. Vırýstyń taralý qaýpin azaıtý men karantındik sharalar kezinde kásipkerlerdiń qyzmetin jalǵastyrýǵa múmkindik beretin «Ashyq» jobasy sáýirdiń 26–nan bastap, elimizdegi barlyq óńirlerde júzege asyryla bastaıdy.
Jańa júıe QR-kod arqyly azamattardyń mártebesin, ıaǵnı vırýsty tasymaldaýshy bolyp tabylatyndyǵyn nemese tabylmaıtyndyǵyn anyqtaıdy.
Jıyn barysynda departament mamandary QR Bas memlekettik sanıtarııalyq dárigeriniń 2021 jyldyń 13 sáýirdegi №14 «Kásipkerlik obektilerinde «Ashyq» mobıldik qosymshasyn engizý boıynsha pılotty júrgizý týraly» Qaýlysynda kórsetilgen jobaǵa qatysty algorıtmderdi túsindirip ótti.
Mamandardyń málimetinshe, Túrkistan qalasynda «Rixos Turkistan» qonaq úıi men «Kinopark» kınoteatry, Maqtaaral men Jetisaı aýdandarynda monshalar «Ashyq» júıesin qoldanyp otyr. Pılottyq jobaǵa qatysý úshin qazirgi tańda 46 kásipkerden infokazakhstan.kz saıty arqyly ótinim túsken. Kınoteatrlar, qoǵamdyq tamaqtaný obektileri, qosymsha bilim berý uıymdary ótinimderdi salalyq qaýymdastyq arqyly bere alady.
