Túrkistan oblysynda 50-den astam páterdi tonaǵan kúdikti ustaldy
Ol turǵyn úılerdiń terezesin buzyp kirip, bólmelerdegi aqsha men altyn buıymdardy urlap kelgen. Al oljasyn Shymkent qalasyndaǵy lombardtarǵa ótkizip, aqshany óz qajettiligine jumsap otyrǵan.
«Bul qylmysty ashý maqsatynda, krımınaldyq polıtsııa basqarmasynyń tájirıbeli jedel ýákilderi men qazyǵurttyq polıtseılerden jedel-tergeý tobyn qurdyq. Páter urysyn ustaý baǵytynda jan-jaqty izdestirý sharalary iske asyryldy. Qylmysty ashý baǵytyndaǵy arnaıy is-sharalar júrgizildi. Nátıjesinde, kúdiktiniń jeke basy anyqtaldy. Ol munyń aldyn da páter urlyǵymen sottalǵan Shymkent qalasynyń turǵyny bolyp shyqty»,- dedi Túrkistan oblysy polıtsııa departamenti bastyǵynyń orynbasary Qurmanbek Sahov.
Tergeý barysynda kúdiktiniń sońǵy úsh jyl ishinde 50-den astam úıge urlyqqa túskeni anyqtalǵan. Ózi de Qazyǵurt, Keles, Saryaǵash, Ordabasy aýdandarynda jasaǵan urlyqtaryn moıyndaǵan.
«Qazirgi tańda atalǵan jaıttar boıynsha sotqa deıingi tergeý amaldary júrgizilýde. Kúdikti qamaýǵa alyndy. Aıǵaqty zat retinde urlanǵan altyndardyń bir bóligi tárkilenip, zańdy ıelerine qaıtaryldy», - dedi Qurmanbek Sahov.
