Túrkistan oblysynda 5 jyl buryn janarmaı beketin tonaǵan kúdiktiler ustaldy
TÚRKІSTAN. QazAqparat - Túrkistan oblysynda 5 jyl buryn janarmaı beketin tonaǵan kúdiktiler ustaldy, dep habarlaıdy QazAqparat tilshisi.
Oqıǵa 2017 jyly Túlkibas aýdanynda bolǵan.
Qarýly adamdar jol boıyndaǵy janarmaı quıý beketine shabýyl jasap, 100 000 teńgeden astam aqshasy bar seıfti alyp, izin jasyrǵan.
Atalǵan jaıtty polıtsııa qyzmetkerleri qaraqshylyq babymen tirkedi. Alaıda kúdiktilerdi izdeý men ustaý jumysy sol kezde tıisti nátıjesin bermedi.
«Bul ashylmaǵan qylmystardyń qatarynda boldy. Qylmyskerlerdiń jeke basyn anyqtaý jáne olardy ustaý boıynsha jedel sharalar sodan beri jalǵasyp keldi. Ótken jyly qaraqshylyq shabýylǵa qatysy Shymkent qalasynyń eki turǵyny nazarymyzǵa tústi. Jedel sharalardy júrgizý barysynda biz olardyń bireýin Saıram aýdanynan ustadyq. Kóligin tekserý kezinde ishinen sholaq ańshy myltyǵy men esirtki tabyldy. Al onyń turǵylyqty jerin tintý kezinde esirtki tárkiledik» - deıdi Túrkistan oblysy polıtsııa departamenti bastyǵynyń orynbasary Qurmanbek Sahov.
Al, ekinshi kúdikti turǵylyqty jeri boıynsha qolǵa túsken.
Tergeý barysynda olar janarmaı beketine qaraqshylyq shabýyl jasap, fızıkalyq turǵyda qoqań-loqqy kórsetip, ishinde aqshasy bar seıfti urlap ketkenin moıyndaǵan.
«Qazirgi tańda ustalǵandarǵa qatysty QR QK-niń 192, 287 jáne 296 baptary boıynsha sotqa deıingi tergeý júrip jatyr. Kúdiktiler buryn sottalǵan, qazir olar qamaýǵa alyndy»- dedi podpolkovnık Qurmanbek Sahov.
