Túrkistan oblysynda 5-synyp oqýshysyn avtobýs basyp ketken
TÚRKІSTAN. QazAqparat - Túrkistan oblysynda 5 synypta oqıtyn balany oqýshylar tasymaldaıtyn avtobýs basyp ketken. 11 jastaǵy Meırambek Rysbekov júrip bara jatqan avtobýstan túsip qalyp, mert boldy, dep habarlaıdy QazAqparat tilshisi.
Qaıǵyly jaǵdaı aǵymdaǵy jyldyń 29 qańtar kúni Keles aýdanyna qarasty Júzimdik aýylynda boldy. Atalǵan avtobýs 4 shaqyrym jerdegi kórshi Birlesý aýyldyq okrýginen balalardy tasymaldaǵan.
«Tańerteń saǵat 8-de úıden shyǵyp ketken. Avtobýsqa mingen kezde onyń synyp jetekshisi Elmıra Kúzerbaeva avtobýstyń esigin qarap turasyń dep turǵyzyp qoıǵan. Shamamen 60 shaqty bala mingen. Balalardyń aıtýynsha, ol 700 metrdeı júrgende 10 synypta oqıtyn bir qyzben ekeýi ursysyp qalady. Ol balamdy úsh-tórt ret tepken. Sol kezde júrip bara jatqan avtobýstyń esigi ashylyp ketedi. Ony tergeýshige júrgizýshiniń ózi de moıyndaǵan. "Esigim ashylyp kete beredi", dep aıtqan Al balam avtobýstyń esiginen ustap qalǵan. Sol kezde álgi qyz balamnyń qolynan uryp, ol qulap ketken. Meırambek aldyńǵy esikten qulap, artqy dóńgelek ony basyp ótken. Biraq avtobýs toqtamastan, mektepke bir-aq barǵan. Balalar bolǵan oqıǵany apaılaryna aıtqan. Ony shamamen 20 mınýttan keıin basqa aýyl turǵyny ólip jatqan jerinen taýyp alǵan»,- deıdi balanyń ákesi Bektursyn Sátbaev.
Qazirgi tańda tergeý sharalary júrgizilýde. Oblystyq PD baspasóz qyzmetiniń málimetinshe, qaıǵyly oqıǵanyń mán-jaıy anyqtalýda.
«Atalǵan jol-kólik oqıǵasy Keles APB-ine tirkelgen. Qylmystyq kodekstiń 345 baby 3 bóligimen («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy, abaısyzda adam ólimine ákep soqqan is-áreket») boıynsha sotqa deıingi tergeý amaldary júrgizilýde. Birneshe saraptamalar taǵaıyndaldy. Sotqa deıingi tergeý jalǵasýda», delingen habarlamada.
