Túrkistan oblysynda 5 myńǵa tarta jas qurylys jumystaryna tartylady

TÚRKІSTAN.QazAqparat - Túrkistan oblysynda jazǵy demalys kezinde 5 myńǵa tarta jas qurylys jumystaryna tartylady. «Túrkistan jastarynyń qurylys jasaǵy» uıymy qurylyp, 3000-nan astam azamattyń tizimi jasalǵan. Bul týraly búgin oblys ákimi Janseıit Túımebaev kezekti esep berý jıynynda málimdedi, dep habarlaıdy QazAqparat tilshisi.

Aımaq basshysynyń aıtýynsha, búginde oblysta jastardyń sany 500 myńnan asady. Bıylǵy jyly «Jastar praktıkasy» baǵdarlamasy aıasynda 5500-ge jýyq jasqa qoldaý bildirý úshin 2 mlrd teńge bólinedi. «Jas kásipker» jobasy aıasynda, 2 mln teńge kóleminde kepilsiz «OŃTÚSTІK» aımaqtyq ınvestıtsııalyq ortalyǵy arqyly 8 joba qarjylandyryldy. «Serpin - 2050» jobasy boıynsha 2018 jyly 1 589, bıyl qosymsha 137 jas grantqa ıe bolǵan. Oblystyq Jastar resýrstyq ortalyǵy janynda jastardyń bos ýaqytyn tıimdi paıdalaný úshin 24 úıirme men klýb jumysyna 14 myńǵa jýyq jastar qatysyp júr.

«Elbasymyz jastarmen ótken kezdesýinde jastarǵa baılanysty negizgi 4 máselege toqtaldy. Sonyń biri - jumyssyzdyq. Elbasymyz jastardy Túrkistan qalasynyń qurylysyna tartýdy arnaıy sóz etti. Búgingi tańda biz aqpannyń ishinde merdiger qurylys kompanııalarymen memorandýmǵa otyryp, naýryzdan bastap jastardy qurylys jumystaryna jiberemiz. Turaqty jalaqy kólemi 70 myń men 100 myń teńge arasynda bolmaq. Oǵan qosa, «Jasyl el» baǵdarlamasy arqyly 1300-deı jas jumyspen qamtylady. Sondaı-aq, Elbasy óz sózinde ishki týrızmdi damytýdy, ıaǵnı sheteldik týrısterdi kóptep tartýdy atap ótti. Kelgen týrısterge óńirimizdiń tereń tarıhyn tanytyp, halyqtyń qonaqjaılyǵyn kórsetip, kıeli jerlerdiń erekshelikterin laıyqty túsindirip bere alatyn 100 gıdti arnaıy oqý kýrsynan ótkizip, jumysqa ornalasýyna múmkindik jasaımyz»,- dedi Janseıit Túımebaev.

Oblys basshysynyń sózinshe, bıyl stýdentterdi óńirdegi tarıhı-mádenı týrıstik aımaqtarǵa ekskýrsııa uıymdastyrylatyn bolady. Jastardyń alǵan áserleri týraly saıttarda, áleýmettik jelilerde taratyp, eń úzdikterin marapattalmaq.

Budan bólek, osy aqpan aıynan bastap «Jas kásipker» baǵdarlamasyna ózgerister engizildi. Jas kásipker kepilsiz 2 mln teńgege deıingi jeńildetilgen nesıeni jyldyq 4%-ben alatyn bolady.

«Aýylsharýashylyǵyn qoldaý qory arqyly aýyl aımaqtaǵy 200-den astam jas kásipkerge tómen paıyzben (6 %) 1,5 mlrd teńge nesıe berýdi kózdep otyrmyz. Sondaı-aq, 1200 jumyssyz azamat kásipkerlik negizderi kýrstarynan ótkizip, olardyń keminde 80%-yna tómendetilgen paıyzben nesıe beriletin bolady. «Jastardy turǵyn úımen qamtý» jobasy aıasynda túrli kózderden 260 jasty baspanamen qamtý kózdelýde»,- dedi Janseıit Túımebaev.