Túrkistan oblysynda 5 mektep dırektory para alý kezinde ustalǵan
TÚRKІSTAN. QazAqparat - Túrkistan oblysynda 5 mektep dırektory men 1 balabaqsha meńgerýshisi para alyp ustalǵan. Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttigi Túrkistan oblysy boıynsha departamenti basshysynyń orynbasary Ábilqasym Jorabekov málim etti, dep habarlaıdy QazAqparat tilshisi.
Ábilqasym Jorabekovtyń sózinshe, Saıram aýdanyndaǵy Fýrkat atyndaǵy mektep dırektory I. Ahmedov muǵalimdikke jumysqa qabyldaý úshin 850 myń teńge para alý kezinde ustalyp, 3 jylǵa bas bostandyǵynan aıyrylǵan.
«Jetisaı qalasyndaǵy №119 mekteptiń dırektory S.Ahmedova tárbıeshini jumysqa qabyldaý úshin 500 myń teńge surap, quzyrly organ ókilderiniń qolyna túsken. Dırektor 4 jylǵa bas bostandyǵynan aıyryldy. A. Saıram aýdany, Qarabulaq aýylyndaǵy «Dalabazar» orta mektebiniń dırektory baǵbanshyny jumysqa qabyldaýǵa 300 myń teńge alǵany úshin 3,6 jylǵa bas bostandyǵynan aıyryldy. Túlkibas aýdanyndaǵy M.Mámetova atyndaǵy orta mekteptiń dırektory A.Jalbıev ádiskerdi jumysqa qabyldaý úshin 150 myń teńge alý kezinde ustalyp, sotty boldy. Ómir boıyna memlekettik qyzmet atqarý quqyǵynan aıyrylyp, 9 mln teńge aıyppul tóleýge mindetteldi. Kúni keshe, ıaǵnı 14 qyrkúıekte Saıram aýdanyndaǵy «Kúnshýaq» balabaqshasynyń meńgerýshisi A.Toqabaeva mekeme esepshisiniń deldaldyǵymen tárbıeshiniń kómekshisin jumysqa qabyldaý úshin 200 myń teńge para alý kezinde ustaldy. Sondaı, Jetisaı aýdanyndaǵy N.Tórequlov atyndaǵy orta mekteptiń dırektory S.Sabyrhanov laborantty jumysqa qabyldaý úshin 200 myń teńge alý kezinde qolǵa túsken. Qazir sońǵy eki qylmystyq is sotqa joldandy»,- dedi Departament basshysynyń orynbasary.
Aıta keteıik, óńirde ótken 2017 jyly paramen ustalǵan Oblystyq bilim basqarmasynyń burynǵy basshysynan bastap birqatar mektep dırektorlary men balabaqsha meńgerýshileri sottalǵan bolatyn. 5 qyzmetker tártiptik jaýapkershilikke tartylyp, 7 qyzmetkerge qatysty usynys joldanǵan.
