Túrkistan oblysynda 42 myńǵa tarta áıel kásipkerlikpen aınalysady
TÚRKІSTAN. QazAqparat - Túrkistan oblysynda qazirgi tańda 134 myń kásipker bolsa, onyń 42 myńǵa jýyǵy - áıelder. Bul týraly óńirlik kásipkerler palatasy janynan qurylǵan Іsker áıelder keńesiniń jıynynda sóz boldy, dep habarlaıdy QazAqparat tilshisi.
«Áıel jáne bıznes» taqyrybynda ótken basqosýǵa oblystaǵy aýdan jáne qalalardan jınalǵan júzge jýyq kásipker áıel qatysty. Jıynda oblystaǵy isker áıelderdiń qatary kún sanap artyp kele jatqany aıtyldy. Ótken jyly óńirde «Bastaý» jobasy arqyly 1730 adam oqysa, olardyń 600-ge jýyǵyn názik jandylar quraǵan.
Túrkistan oblystyq Іsker áıelder keńesiniń tóraıymy Saltanat Tólegenovanyń sózinshe, aımaqta kásibin jandandyrǵysy kelgen qyz-kelinshekterge qaıtarymsyz granttar men qomaqty qarajattar berilýde. Jańadan saılanǵan tóraıym sondaı-aq, jıynda kásipker áıelderdiń start-ap jobalaryn tanystyryp, sheberlik sabaǵyn ótkizdi.
Ol oblysta turatyn qyz-kelinshekterdi kásipkerlikpen aınalysýdyń joldaryn úıretip, qyr-syryn sóz etti. Osy maqsatta memleket tarapynan qandaı jeńildikter jasalyp jatqanyn, ondaı qoldaýlarǵa qol jetkizý úshin qandaı áreket kerektigin aıtyp ótti.
