Túrkistan oblysynda 42 500 teńgeni 540 myńnan astam turǵyn alǵan

TÚRKІSTAN. QazAqparat – Tótenshe jaǵdaı kezinde jumyssyz qalǵan azamattarǵa qoldaý kórsetý maqsatynda eń tómengi jalaqy mólsherinde beriletin 42500 teńgeni Túrkistan oblysy boıynsha 544,5 myń turǵyn alǵan. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaevanyń aıtýynsha, azamattarǵa áleýmettik tólem berý úshin 23,1 mlrd teńge bólingen, dep habarlaıdy QazAqparat tilshisi.

Ásııa Temirbaevanyń sózinshe, jalaqysy saqtalmaıtyn demalysta júrgen jáne tólemge quqyǵy bar qyzmetkerlerdiń tizimin jumys berýshiler egov.kz jáne 42500.enbek.kz portaldary arqyly usyna alady.

«Jumys berýshiler qyzmetiniń shektelý faktisin quramyna Ulttyq kásipkerler palatasy men kásipodaqtardyń ókilderi kiretin aýdandyq jáne qalalyq shtabtar rastaıdy. Basqa sanattaǵy azamattar tólemderdi taǵaıyndaý úshin óz betinshe ótinish beredi. Ózin-ózi jumyspen qamtyǵan adamdarǵa birjolǵy tólemge ótinish berý úshin biryńǵaı jıyntyq tólemdi (BJT) qaıta tóleý mindetti emes. Ótinishter 2020 jylǵy 1 qyrkúıekke deıin qabyldanady», - dedi Ásııa Quralqyzy.

Basqarma basshysy sondaı-aq, aǵymdaǵy jyldyń shilde aıynda shekteý sharalarynyń engizilýine baılanysty tabysynan aıyrylǵan jaǵdaıda MÁSQ-tan birjolǵy tólem taǵaıyndaý týraly ótinimderdi kelesi portaldar arqyly berýge bolatyny atap ótti. Atap aıtqanda, «Elektrondyq úkimet» veb-portaly; 42500.enbek.kz portal; telegram-bot-tar; Aitu messendjerindegi 42500.enbek.kz qosymshasy; ekinshi deńgeıdegi bankterdiń mobıldi qosymshalary men ınternet-resýrstary bar.

Budan bólek, tótenshe jaǵdaıǵa baılanysty aǵymdaǵy jyldyń sáýir-mamyr aılarynda oblysta 5 áleýmettik topqa jatatyn azamattarǵa azyq-túlik-turmystyq jıyntyqtarmen qamtamasyz etý úshin ótemaqy retinde 5567 teńge berilgen. Barlyǵy oblys boıynsha sáýir-mamyr aılarynda 160,6 myń adam 1,8 mlrd teńgege azyq-túlik-turmystyq jıyntyǵymen qamtylǵan.

Sondaı-aq, baspasóz máslıhatyna qatysqan QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń Túrkistan oblysy boıynsha departamenti basshysynyń orynbasary Marat Arharov shekteý sharalary kezindegi múgedektiktiń taǵaıyndalýy men tanylýy jaıyn sóz etti. Sonymen qatar, oblystyq eńbek ınspektsııasy jónindegi basqarma basshysynyń orynbasary Begman Nurmahanov shekteý is-sharalaryn engizýge baılanysty kirisinen aıyrylǵan adamdardyń tizimin jáne talaptarǵa sáıkes kelýin jumys berýshi aıqyndaıtynyn aıtty. Jumys berýshi Qaǵıda talaptaryn saqtamaǵan jaǵdaıda jumysshy eńbek ınspektsııasy jónindegi jergilikti organǵa aryzdanýǵa bolatynyn jetkizdi.