Túrkistan oblysynda 400-ge jýyq dáriger koronavırýs ınfektsııasymen kúresip júr
TÚRKІSTAN. QazAqparat - Túrkistan oblysynda qazir 400-ge jýyq dáriger, orta jáne kishi býyn medıtsına qyzmetkerleri kúndelikti qaýip-qaterdiń ortasynda adam ómirine arasha túsip, koronavırýs indetimen kúresýde, dep habarlaıdy QazAqparat oblysy ákiminiń baspasóz qyzmetine silteme jasap.
Naýqastarǵa táýlik boıy medıtsınalyq em kórsetip júrgen «Jetisaı aýdandyq ınfektsııalyq gospıtaldyń» meńgerýshisi Zamıra Tashımova áriptesteriniń bir kisideı kúresip, kómekke qosymsha dárigerler jumyldyrylyp jatqandyǵyn aıtady. 30 jyldan astam tájirıbesi bar ınfektsıonıst ózi de elde tótenshe jaǵdaı jarııalanǵaly beri kúndiz-túni aıanbaı jumys isteýde.
«Táýlik boıy aýrýhanada koronavırýsqa shaldyqqan naýqastardy qolymyzdan kelgenshe emdep jatyrmyz. Árıne, ol azamattardyń qınalǵanyn kórgende júregimiz aýyrady. Biraq, qıyn sátte barynsha bekem bolyp, tabandylyq kórsetýimiz qajet ekenin túsinemiz. Jetisaı aýdandyq ınfektsııalyq gospıtalda kerek nárseniń barlyǵy bar. Óz tarapymyzdan da barlyq saqtyq sharalaryn qadaǵalaýdamyz. 14 kún saıyn tekserilip, koronavırýs indetine synama tapsyramyz», - deıdi Zamıra Tashımova.
Al, Túrkistan qalalyq ortalyq aýrýhanasy juqpaly aýrýlar bóliminiń karantın rejıminde jumys istep jatqan dárigerleri óz taraptarynan halyqqa arnaǵan keńesterine túsinistikpen qaraýǵa shaqyrady.
«El amandyǵy úshin úıde qalyp, saqtyq sharalaryn qadaǵalaý qajet. Óńirge qaýipti aımaqtardan kelgen azamattar jergilikti emhanaǵa habarlasyp, 14 kúndik karantınde bolýlary tıis. Qazirgideı qıyn sátte myńdaǵan adamnyń qaýipsizdigi, bir adamnyń jaýapkershiligine baılanysty bolǵan kúıge tústik. Sol sebepti ár azamatpen jeke túsindirme jumystaryn da júrgizemiz», - deıdi eki aptadan beri úı betin kórmegen Túrkistan oblystyq qoǵamdyq densaýlyq basqarmasynyń shtattan tys ınfektsıonıst-dárigeri Zamıra Jorabekova. Dáriger kúni-túni provızorlyq statsıonarda qyzmette. Otbasymen qaıta qaýyshatyn kúndi armandaıdy. Úıde kúıeýimen 2 ul, 1 qyzy kútip otyr. Kishkentaıynyń jasy 7 –de. Óz ómirlerin báske tikken osyndaı dárigerlerdiń eńbegi eren.
Jalpy, oblys boıynsha koronavırýs ınfektsııamen aýyrǵan naýqastardy jatqyzý úshin 150 tósek-oryn jasaqtalǵan. Pandemııalyq indetke uqsas klınıkasy bar naýqastardy jatqyzyp, dıagnozyn anyqtaý maqsatynda 510 tósek orynǵa provızorlyq gospıtal qarastyrylǵan. Odan bólek barlyq aýdandar men qalalardaǵy ınfektsııalyq aýrý bólimderi daıyn. Qarym-qatynasta bolǵandardy oqshaýlaý úshin oblys aýmaǵyna 955 tósek orynǵa karantın ortalyqtary ashylǵan.
