Túrkistan oblysynda 4 jasar bala sýǵa ketti
ASTANA. QazAqparat - Túrkistan oblysynda qutqarýshylar ata-ana qaraýynsyz qalyp qoıyp, aryqqa batyp ketken 4 jasar balany izdestirip jatyr, dep habarlaıdy QazAqparat tilshisi TJK baspasóz qyzmetine silteme jasap.
«Qutqarýshylar Saryaǵash aýdanynyń Aşysaı aýylyna qarasty «Qurkeles» sýarmaly aryǵynan 2014 jyly dúnıege kelgen balany izdestirip jatyr» delingen habarlamada.
Qutqarýshylardyń aıtýynsha, 3 tamyzda ata-ana qaraýynsyz qalyp qoıǵan búldirshin abaısyzda aryqqa qulap ketip, sýǵa batyp ketken.
Budan bólek, Almaty jáne Soltústik Qazaqstan oblystarynda sýǵa ketken eki er adamdy izdestirý jumystary jalǵasyp jatyr. Baspasóz qyzmetinde málim etkendeı, 26 jastaǵy jigit balyq aýlaý kezinde Qapshaǵaı sý qoımasyna batyp ketken.
Taǵy bir uqsas jaǵdaı Aıyrtaý aýdanyna qarasty Imantaý aýylynyń «Solnechnyı VIP» demalys ornynda bolǵan. 55 jastaǵy er adam Imantaý kólinde shomylyp jatyp, sýǵa batyp ketken.
Sondaı-aq, Pavlodarda Ýsolka kólinde shomylyp júrip, jaǵaǵa óz betinshe júzip jete almaǵan eki jasóspirim qutqaryldy. Olarǵa oqıǵa ornynda psıhologııalyq kómek kórsetildi.
