Túrkistan oblysynda 4 azyq-túlik beldeýi iske qosylady
TÚRKІSTAN. QazAqparat - Túrkistan oblysynda 4 birdeı azyq-túlik beldeýi iske qosylady, dep habarlaıdy QazAqparat oblys ákiminiń baspasóz qyzmetine silteme jasap.
Mundaǵy maqsat - álemdegi ozyq tehnologııalardy, ozyq agrotehnologııalardy, topyraqty óńdeýdiń ozyq tehnologııalaryn paıdalana otyryp, eńbek ónimdiligin 2,5 esege arttyrý. Bul týraly búgin Ortalyq kommýnıkatsııalar qyzmeti uıymdastyrǵan kóshpeli brıfıngte oblystyq aýyl sharýashylyǵy basqarmasynyń basshysy Nurbek Badyraqov málimdedi.
Onyń sózinshe, bul jobalar ǵalymdardyń súımeldeýimen júzege asyrylady.
«Oblys ákiminiń tapsyrmasyna sáıkes Túrkistan qalasynyń aınalasynan radıýsy 20 shaqyrym jerde azyq-túlik beldeýin qalyptastyrý jobasyn iske asyrý boıynsha naqty tapsyrmalar qoıdy. Sol tapsyrmanyń aıasynda qazirgi tańda 20 myń gektar jer anyqtaldy. Sonyń ishinde birinshi kezeńinde Túrkistan-Shymkent baǵytynda myń gektar alqapqa osy azyq-túlik beldeýin qalyptastyrý jobasy bastalyp ketti. Al, keler jyly bizdiń Túrkistan - Qyzylorda, Túrkistan - Otyrar, Túrkistan - Kentaý baǵytynda jalpy 14 myń gektar alqapta iske asatyn bolady», - dedi basqarma basshysy.
Qazirgi tańda Shaǵa aýyldyq okrýginde jalpy 121 sýbektiden turatyn arnaıy «Yntymaq» aýyl sharýashylyǵy óndiristik kooperatıvi qurylyp otyr. Bul myń gektar alqapta jalpy jańbyrlatyp sýarý tehnologııasymen 400 gektar jerge dándik júgeri daqyly egiledi. 400 jerge súrlendik júgeri jáne 200 gektar aýmaqta jońyshqa daqyly egiledi. Alynǵan ónim atalǵan kooperatıvke jetkizilip, qaıta óńdeledi.
