Túrkistan oblysynda 4,5 myńnan astam turǵynnyń zeınetaqysy úılerine jetkizilip berildi
Bul týraly «Qazposhta» AQ Túrkistan oblystyq fılıalynyń dırektory Baqytjan Ysqaq málimdedi, dep habarlaıdy QazAqparat tilshisi.
Baqytjan Ysqaqtyń aıtýynsha, bul sharalar tótenshe jaǵdaı kezinde mekeme ǵımarattaryna adamdardyń kóp shoǵyrlanýyn boldyrmaý maqsatynda qolǵa alynǵan. Zeınetkerlerge qyzmet kórsetý barysynda mamandardyń sanıtarlyq tazalyqty tıisti deńgeıde saqtap, barynsha azamattarǵa qaýip tóndirmeý máseleleri eskerilgen.
«Zeınetaqyny taratý kezinde barlyq qyzmetker sanıtarlyq talaptarǵa saı jabdyqtaldy. Basqarma qyzmetkerleri, operatorlar, hat tasýshylar, suryptaýshylar, kólik júrgizýshileri men ınkassatorlardyń barlyǵy derlik betperdeler, qolǵaptar jáne antıseptıktermen qamtyldy. Múmkindigi shekteýli jáne jasy 80-nen asqan azamattarǵa zeınetaqy men járdemaqyny mekenjaılaryna arnaıy saqtyq kıimi kıgen mobıldik top jetkizip berdi. Zeınetaqy alýshylar da qyzmet alý barysynda betperde kıip, adamdardyń ózara 2 metr araqashyqtyq saqtaýy baqylaýda boldy», – dedi Baqytjan Bekbolatuly.
Sondaı-aq, «Qazposhta» AQ Túrkistan oblysy boıynsha fılıaly 94208 azamatqa esepshot ashyp, memleket tarapynan beriletin 42500 teńge járdemaqyny alýyna jaǵdaı jasaǵan. Búginge deıin bul azamattardyń 20 myńnan astamy tıisti qarajatyn alyp úlgergen.
